ORASAUN BA MARIA INAN SALA-LAEK HO MATAN EKOLOJIA
Dili – Iha 8 Dezembru solenidade Nai Feto Maria Imakulada komunidade Divina Provvidenzia selebra festa ho Menina sira, liuliu hodi hahi no hanai Maromak domin na’in iha Santa Misa no loraik ami dedika jogos no momentu rosario iha ne’ebé ami halo reflesaun hamutuk hodi agradese Maromak ba Maria nia presenza iha ami nia moris no misaun. Agradese tamba ho orasaun Ave Maria ida ne’ebé Don Bosco reza ho Bartolomeo Garelli halo misaun Salesiana sai metin no kontinua hetan Nai Feto ninia protesaun to’o ohin loron. Iha ami nia orasaun Rosario hamutuk ho intensaun sira seluk ami reza liu liu ba foinsa’e no oratoriano sira ida idak atu kontinua laran metin ba Maria nudar Ausiliadora no Imakulado nebe tulun no proteje nia oan sira nafatin. Ho Maria nia beleza ami kontempla Maromak nia hahalok diak hotu nebe halo ba umanidade tomak liu husi Maria Viejen ninia kolaborasaun.
Ami Kontempla misterio sira ne’e ho matan ekolojia. Tamba Maria mak ita nia inan no kreasaun tomak nia inan no esperansa. Maria inan ne’ebé bali Jesus, oras ne’e dadaun tau matan ho domin no preukupa materna ba mundo ida ne’e ne’ebé kanek. Hanesan nia tanis ho fuan kanek tamba Jesus nia mate, nunee mos ohin nia laran sadia tamba ema kiak krusifikadu nia terus no kriatura sira mundo ida ne’e nia moris, ho Jesus nudar ema ne’ebé nakfilak an tiha ona no kriatura sira tomak hananu nia beleza. Nia mak feto ne’ebé hatais ho loron, fulan iha nia ain akos no ho koroa ho fitun sanulu resin rua iha nia ulun. Sae’ tiha ba lalehan, nia mak inan ne’ebé glorifika tiha ona, hamutuk ho Cristo ne’ebé moris hias, kriasaun nia baluk ida hetan ona plenitude tomak nia beleza. (Laudato si n. 241)
Maria mak prezensa ida ne’ebe akompanha no hafunan santidade iha ema nia fuan no ambiente, liuhusi obra Espiritu Santu nian. S. João Bosco assegura katak Maria sempre la’o ho ita. Ami remata orasaun rosario hodi halo Prosisaun badak ba iha Jardim liu hodi kuda aihun ida nudar simbolo fini domin, esperansa no laran metin niaa ne’ebé ami hakarak husik an atu Maria kontinua guia iha ninia eskola virtude nian no hamutuk ho nia ami hatene hadomi no respeita ita nia uma komun hodi sai fermento diak ba tempo ohin loron.
Boa festa ba ita hotu no obrigada barak!
(Ermelinda Almeida FMA)
