Papa Francisco iha Angelus 20 Outubru 2019
Maun no biin-alin sira, bondia!
Leitura daruak liturjia nian propoin mai ita ezortasaun ne’ebé apóstolu Paulo dirije ba ninia kolaboradór fiél Timóteo: «Haklaken lia menon ne’e; iha tempu loos no iha tempu la loos, hato’o nia ba sira. Halakon hanorin bosok bá, korrije buat ne’ebé sala, bolu ema atu halo tuir; maibé halo hotu ne’e ho pasiénsia no hodi hanorin» (2Tm 4,2). Nia tón sinseru: Timóteo tenke sente responsavel ba anúnsiu Liafuan nian.
Loron Mundiál Misionária, ne’ebé selebra ohin, mak okaziaun di’ak ida atu batizadu ida-idak foti konxiénsia loloos kona-ba nesesidade atu koopera iha anúnsiu Liafuan nian, anúndiu Maromak nia Reinu nian liuhusi empeñu foun. Papa Bento XV, tinan atus ida liubá, atu fó impulsu foun ba Kreda tomak nia responsabilidade misionária, promulga Surat apostólika ‘Maximum illud’. Nia sente nesesidade atu kualifika hikas ho modu evanjeliku misaun iha mundu, atu bele purifika husi inkrustasaun koloniál hotu no livre husi kondisionamentu polítika espansaun Nasaun europea sira-nian.
Iha kontestu ohin nian ne’ebé muda, mensajen Bento XV nian sei atuál no estimula atu supera tentasaun ba taka an auto-referensiál no forma hotu pesimizmu pastorál nian, atu loke ita ba novidade ksolok Evanjellu nian. Iha ita-nia tempu ida-ne’e, marka ho globalizasaun ida ne’ebé tenke sai solidária no respeitoza ba povu sira nia partikularidade. Iha kontráriu, nia sei sofre omologasaun no sofre ba konflitu tuan sira podér nian ne’ebé haburas funu no estraga planeta, fiar-na’I sira simu bolun atu lori iha fatin hotu, ho entuziazmu foun, Liafoun Di’ak ne’ebé iha Jezús mizerikórdia manán salan, esperansa manán ta’uk, fraternidade manán inimizade. Kristu mak ita-nia dame no iha Nia divizaun hotu lakon, iha Nia de’it mak iha salvasaun bae m aida-idak no povu ida-idak.
Atu moris misaun iha plenitude iha kondisaun indispensavel ida: orasaun, orasaun ho fervór no la para, tuir Jezús nia hanorin ne’ebé proklama mós iha Evanjellu ohin nian, iha-ne’ebé Nia haktuir ai-knanoik ida «kona-ba nesesidade atu harohan nafatin, hodi lakolen» (Lc 18,1). Orasaun mak apoiu dahuluk Maromak nia povu nian ba misionáriu sira, riku ho afetu no gratidaun ba sira knaar difisil atu haklaken no fó Evanjellu nia roman no grasa ba ema sira ne’ebé seidauk simu. Okaziaun ida di’ak mós atu husu mai ita-nia an: ha’u harohan ba misionáriu sira? Ha’u harohan ba sira ne’ebé bá dook atu lorii Maromak nia Liafuan h sosin? Mai ita hanoin kona-ba ne’e.
Maria, ema hotu nia inan, akompaña no proteje mmisionáriu sira Evanjellu nian, loron-loron.
