Papa Francisco nia lia-menon molok harohan Angelus, 20 Juñu 2021
Maun no biin-alin sira, bondia!
Iha liturjia ohin nian haktuir epizódiu Jezús hapara tempestade (Mc 4,35-41). Roo ne’ebé eskolante sira uza hodi hakat liu hasoru tasi anin boot no laloran no sira ta’uk atu mout. Jezús ho sira iha roo, maski nune’e nia toba iha sumasu leten iha roo ikun. Dixípulu sira, nakonu ho ta’uk, hakilar ba Nia: «Mestre, ita la preokupa katak ita atu mate?» (v. 38).
No dalabarak ita mós, hasoru prova sira moris nian, ita hakilar ba Na’i: “Tan sá Ita nonok no la halo buat ida mai ha’u?”. Liuliu bainhira ita parese mout, tanba domin eh projetu ne’ebé ita tau esperansa boot hanesan lakon; eh bainhira ita sente laloran ansiedade nian baku ita ba mai; eh bainhira ita sente problema sira hamout ita eh lakon iha tasi moris nia laran, lahó dalan no lahó portu. Eh ida tan, iha momentu sira ne’ebé lakon forsa atu bá oin, tanba falta serbisu eh dignoze ida ita la hein halo ita ta’uk ba ita-nia saude eh ema ne’ebé ita hadomi nian. Iha momentu barak ne’ebé ita sente iha tempestade laran, ita sente kuaze atu mate.
Iha situasaun sira ne’e no iha barak seluk tan, ita mós sente sofoka ita no, hanesan dixípulu sira, ita iha risku atu la haree buat ne’ebé importante liu. Iha roo, defaktu, maski toba, iha Jezús, no partilla ho ninia emar sira buat hotu ne’ebé akontese daudaun. Ninia dukur, se husi parte ida halo ita hafodak, husi parte seluk tau ita iha prova. Na’i iha-ne’ebá, prezente; defaktu, Nia hein – bele dehan – atu iha envolve Nia, invoka Nia, tau Nia iha buat ne’ebé ita esperimenta nia sentru. Ninia dukur provoka atu ita fanun Nia. Tanba, atu sai Jezús nia dixípulu, la to’o fiar katak Maromak iha, eziste, maibé presiza envolve Nia, presiza hasae lian ho Nia. Imi rona ida-ne’e: presiza hakilar ba Nia. Orasaun, dalabarak, mak hakilar ida: “Na’i salva ha’u!”. Ha’u haree iha programa “A sua immagine”, ohin, Loron Refujiadu nian, ema barak mai ho roo no iha momentu atu mout sira hakilar: “Salva ami!”. Iha ita-nia moris mós akontese hanesan: “Na’i salva ami!”, no orasaun sai hakilar ida.
Ohin ita bele husu: sá loos anin sira ne’ebé baku hasoru ha’u-nia vida, sá loos laloran ne’ebé hanetik ha’u-nia navegasaun no tau iha perigu ha’u-nia vida espirituál, ha’u-nia família nia moris, ha’u-nia vida psíkika mós? Buat sira-ne’e hotu ita hato’o ba Jezús, ita konta hotu ba Nia. Nia hakarak ida-ne’e, Nia hakarak ita kaer metin Nia atu hetan abrigu hasoru laloran anormál moris nian. Evanjellu haktuir katak dixípulu sira hakbesik ba Jezús, fanun Nia no koa’lia ba Nia (kf v. 38). Ida-ne’e mak inísiu ita-nia fiar nian: rekoñese katak mesak ita la tahan, katak ita presiza Jezús hanesan mariñeiru sira presiza fitun sira atu hetan dalan. Fiar hahú husi konviksaun katak ita la natón ba an rasik, hahú husi sente katak ita presiza Maromak. Bainhira ita manán tentasaun atu taka iha an rasik, bainhira ita hakat liu relijiozidade falsa ne’ebé lakohi inkomoda Maromak, bainhira ita hakilar ba Nia, Nia bele halo maravilla iha ita. Ne’e mak kbiit maus no estraordináriu orasaun nian, ne’ebé halo milagre sira.
Jezús, ne’ebé dixípulu sira harohan bá, halo anin no laloran sira hakmatek. No halo pergunta ida, pergunta ne’ebé kona mós ita: «Tanba sá imi ta’uk? Imi seidauk fiar?» (v. 40). Dixípulu sira defaktu nakonu ho ta’uk, tanba sira hateke ba laloran duké hateke ba Jezús. No ta’uk lori ita atu hateke ba difikuldade sira, problema aat sira no la hateke ba Na’i, ne’ebé dalabarak toba. Mai ita mós nune’e: dala hira mak ita hateke ba problema sira duké ba hasoru Na’i no hato’o ba Nia ita-nia preokupasaun sira! Dala hira mak ita husk Na’i iha sikun ida, iha roo moris ninia ikun, atu fanun de’it iha momentu nesesidade nian! Ohin ita husu grasa fiar ida ne’ebé la kolen atu buka Na’i, atu dere ninia Fuan nia odamatan.
Atu Virjen Maria, ne’ebé iha nia moris la para atu konfia iha Maromak, fanun iha ita nesesidade vitál atu konfia iha Nia loron ba loron.
