Baucau – Oratóriu Baucau sai uma festa nian no pátiu atu belun sira hasoru malu no moris iha ksolok, iha loron domingu 26 Janeiru 2014 hodi selebra festa Don Bosco nian.
Jogu, espresaun ksolok no amizade, mak elementu indispensavel Oratóriu nian. Desportu no jogu, teatru, dansa, múzika, quiz “certame”, sai momentu divertimentu, maibé mós momentu formasaun no valór umanu kle’an nian. Labarik, adolexente no foin-sa’e sira, inklui inan sira akompaña sira nia oan iha eventu ne’e. Sira hotu sente ambiente ida família nian, haksolok, sente livre… kolabora atu eventu ne’e la’o ho hakmatek no la hamosu konflitu, nune’e mós hodi tau matan no tulun malu. Iha zona ida ne’ebé fasilmente ne’ebé husi ki’ik kedas labarik sira internaliza modelu violénsia nian ho estilu “gang”, irmán sira, animadora no animadór sira matan-moris atu haree katak labarik sira la sadik malu, respeita malu no simu.
Atividade sira ba festa Don Bosco nian hahú iha domingu 19 Janeiru ho jogu abertu no “certame” eh kuiz Don Bosco nia moris nian iha sentru ida-idak. Hafoin, iha domingu 26 sentru Teulale, sentru Dewaque no Infánsia Misionária halibur hamutuk iha ESSA Teulale atu halo atividade desportu futebol entre grupu sira feto no mane, tuir ho dansa iha komunidade FMA, reza, merenda hamutuk no fahe prémiu ba sira ne’ebé manán.
Oratorianu Teulale hamutuk 132 (mane 49 no feto 85) ho animadór no ajudante animadór na’in 6; oratorianu Dewaque nian hamutuk 104 ho animadór/a na’in 8; grupu Infánsia Misionária hamutuk na’in 66 (mane 13 no feto 53) ho animadora na’in 3 no animadór 1.
Oratóriu sai buras mós tanba irmán sira hamutuk ho membru komunidade edukativa no labarik sira ba vizita família sira hodi konvida labarik sira atu atende oratóriu. Iha aprosimasaun ba família sira, irmán sira hasoru labarik barak ne’ebé nunka mai oratóriu husi Boi-Lé no Wai-Rage. Aleinde ne’e, bele haree família sira nia situasaun, rona sira-nia problema, fó naroman uitoan ba sira no reza hamutuk ho sira.
