Dili – Ohin, 02 Abril 2017 lokraik, Oratoriu Dejukdil halao asaun karidade ba kiak no aileba sira tuir dalan ne’ebe organiza husi Irmaun, Irman no animadores hamutuk ho oratorianu sira iha tempu kuarezma ne’e nia laran. Oratoriano sira nia kompromisu ba kuarezma ne’e mak vizita deretamente katuas, ferik, foin-sa’e sira ne’ebe tur tuir dalan, serbisu nudar aileba faan sasan iha dalan, hodi deskobre Kristru nia oin iha ema hirak ne’e nia moris. Foinsae no labarik sira nia preparasaun material mai husi sira rasik nia an mak hanesan: tersu, imajen, osan rasik hodi fo ba sira ne’ebe kiak no presisa duni tulun.
Iha atividade ne’e sai mos atividade formativu ida ba foin-sa’e no labarik sira, tanba bele sai esperensia forte liuliu fo buat ruma husi sira nia an ba kiak no mukit sira duke simu deit husi ema seluk. Ohin bele dehan katak oratoriano sira maioria sira nia presenza ativa iha asaun karidade ne’e, maski aban sira barak mak sei halao ezame. Ohin bele haree kedas sira ho fuan kontente hakarak fahe sira nia tempu hodi ba vizita kiak sira iha dalan.
Molok sira sai husi fatin oratorio nian, sira hotu prepara an lao tuir grupu. Atividade ba asaun ne’e fahe ba grupu 5 inklui Irman, Irmaun Animadores no oratorianu sira tuir grupu interese nian. Kada grupu lao ba hasoru kiak sira tuir ida-idak nia dalan hodi fahe buat ne’ebe sira iha.
Iha atividade ne’ebe halao mak hanesan: f
o Nasi kotak ne’ebe prepara ona ho bee, hananu ba sira ho musika nia titulu mak “ Hau ema kiak maibe hau riku ho Maromak nia domin”. Iha ema kiak sira mak ita haree Jesus nia oin.
Bainhira remata tiha atividade ne’e, ikus mai oratoriano sira hotu hasoru malu iha monunemtu Nai Feto nian iha Lecidere hodi reza hamutuk liu husi orasaun agradesementu nian ba Nain Feto, hodi hanoin mos kiak sira iha orasaun ne’e, hafoin mak fila ba ida-idak nia uma.
(Ines Freitas)
