RV – Igreja Katólika moris “Ano da Misericórdia”. Iha kuarta 9 Dezembru, iha Vaticano, iha enkontru ho sarani sira, Amu-Papa iha nia katekeze esplika signifikadu “Ano Santo” nian, hodi destaka bolun urjente atu moris “misericórdia” iha mundu ohin nian.
“Ha’u la dehan: di’ak ba Igreja momentu estraordináriu ne’e…lae,lae! Ha’u dehan: Igreja presiza momentu estraordináriu”, Papa Francisco dehan hodi refere ba “Ano da Misericórdia”, ne’ebé hahú iha tersa, 8 Dezembru, ho abertura Porta Santa iha Bazílika S. Pedro.
Papa Francisco enfatiza sentidu “Ano Santo” ne’e nian: tempu favorável atu kontempla mizerikórdia divina ne’ebé hakat liu imite umanu hotu. Maibé períodu ne’e sei sai tebes duni favorável se ema sira hili buat ne’ebé haksolok Maromak: perdua nia oan sira, uza mizerikórdia ba sira atu sira bele sai mizerikordiozu ho ema seluk.
Iha sosiedade, iha serbisu no iha família mós, umanidade presiza urjentemente mizerikórdia, Amu-Papa hateten. Ema balun bele até dehan katak iha problema urjente liu atu rezolve no Papa Francisco rekoñese ida-ne’e, maibé nia fó hanoin katak abut iha kuran mizerikórdia mak domin ba an rasik (amor próprio).
“Iha mundu, buat ne’e (amor prórpio) foti forma atu buka ho modu ezkluzivu interese rasik, prazér rasik no onra sira liga ho vontade atu akumula rikusoin sira, enkuantu iha sarani sira nia vida dala barak falun ho ipokrizia [larna-makerek] no mundanidade. Buat sira ne’e hotu kontáriu ba mizerikórdia”.
Tanba ne’e duni, Papa Francisco destaka ema sira nia nesesidade atu rekoñese sira-nia salan nune’e koko Maromak nia mizerikórdia. “Presiza rekoñese an nu’udar ema maksalak atu reforsa iha ita serteza kona-ba mizerikórdia divina”. No nia hanorin orasaun simples ida atu halo lorloron: “Na’i, ha’u ema maksalak, mai ho ita-nia mizerikórdia”.
Amu-Papa dehan katak ninia dezeju atu iha “Ano Santo” ida-ne’e ema ida-idak halo esperiénsia kona-ba Maromak nia mizerikórdia. Maski ema balun bele hanoin katak ema beik mak hanoin katak ho mizerikórdia bele muda mundu, maibé buat ne’ebé ita dehan Maromak nia frakeza forte liufali ema.
