Iha loron 8 fulan-Maiu tinan 2025, iha oras 7:23 kalan, notísia ne’ebé mundu tomak hotu hein : Bispu Roma nian ba dala 267o maka Kardeál Robert Francisco Prevost, Papa Leão XIV, ne’ebé eleitu hosi Konklave iha votasaun ba dala 4.
Hafoin anúnsiu husi Kardeál Protodiákonu Dominique Mamberti – “Nuntio vobis gaudium magnum, Habemus Papam” – Pontífise foun mosu iha Loggia esterna Bensaun Bazílika Vatikanu nian hodi kumprimenta ema lubun ne’ebé haksolok no fó Bensaun Apostólika “Urbi et Orbi”.
“Dame hela ho imi hotu!” maka ninia liafuan dahuluk . “Maun-alin doben sira, ida-ne’e mak Kristu Moris-Hi’as nia kumprimentu dahuluk, bibi-atan di’ak ne’ebé saran Nia moris ba Maromak nia bibi sira.Ha’u mós hakarak kumprimentu dame nian ida-ne’e horik iha imi-nia fuan, to’o ba imi-nia família sira, ba ema hotu, iha ne’ebé de’it, ba povu hotu, ba rai tomak.Dame hela ho imi!
Ida-ne’e maka Kristu Moris-Hi’as nia dame, dame ida ne’ebé dezarmadu no dame ida ne’ebé dezarma, haraik-an no perseverante. Ida-ne’e mai hosi Maromak, Maromak ne’ebé hadomi ita hotu inkondisionalmente. Ita konserva nafatin iha ita-nia tilun lian fraku maibé sempre aten-barani Papa Francisco nian ne’ebé fó bensaun ba Roma!
Obrigado ba Papa Francisco
Amu-Papa ne’ebé haraik bensaun ba Roma fó nia bensaun ba mundu, ba mundu tomak, iha dadeer Páskua nian ne’ebá. Husik ha’u atu halo tuir bensaun hanesan ne’e: Maromak hadomi ita, Maromak hadomi imi hotu, no buat aat sei la manán! Ita hotu iha Maromak nia liman. Tanba ne’e, labele tauk, ita hamutuk iha liman ba liman ho Maromak iha ita-nia leet, ita la’o ba oin. Ita mak Kristu nia dixípulu sira. Kristu uluk liu ita. Mundu presiza nia naroman. Umanidade presiza Nia nu’udar ponte atu to’o ho Maromak no nia domin. Imi tulun mos ami, hafoin imi mos tulun malu atu harii ponte, ho diálogu, ho enkontru, halibur ita hotu atu sai povu ida de’it nafatin iha dame nia laran. Obrigado ba Papa Francisco!
La’o nu’udar Igreja Unida
Ha’u mós hakarak agradese ba maun-alin kardeál sira hotu ne’ebé hili ha’u atu sai Pedro nia Susesór no la’o hamutuk ho imi, nu’udar Igreja ida ne’ebé unidu buka nafatin dame, justisa, koko nafatin atu serbisu nu’udar mane no feto fiél ba Jezús Kristu, la ta’uk, hodi haklaken Evanjellu, sai misionáriu.
Amu-Papa Agostinianu ida
Ha’u mak Saun Agostinho nia oan-mane, Agostinho ida, ne’ebé dehan: “ho imi ha’u mak sarani no ba imi bispu”. Iha sentidu ida-ne’e ita hotu bele la’o hamutuk ba patria ne’ebá ne’ebé Maromak prepara ona mai ita.
Sai Igreja ida misionária
Saudasaun espesiál ida ba Igreja Roma nian! Ita tenke buka hamutuk oinsá sai Kreda misionária, Kreda ne’ebé harii ponte, diálogu, nakloke nafatin atu simu hanesan prasa ne’e ho liman nakloke. Hotu-hotu, sira hotu ne’ebé presiza ita-nia karidade, ita-nia prezensa, diálogu no domin.
No se imi mos permite ha’u, hau sauda ho imi ho liafuan ida, ba ema hotu no liuliu ba ha’u-nia dioseze doben Chiclayo nian, iha Peru, iha-ne’ebé povu haraik-an ida akompaña sira-nia bispu, fahe sira-nia fiar no fó nune’e, barak tebes atu kontinua sai Kreda Jezús Kristu nia Oan-Mane nian.
No se imi mos permite ha’u sauda imi ho liafuan ida, ba ema hotu no liuliu ba ha’u-nia dioseze doben Chiclayo nian, iha Peru, iha-ne’ebé povu fiel-na’in ida akompaña sira-nia bispu, fahe sira-nia fiar no fó buat barak, buat barak atu kontinua sai Jezús Kristu nia Igreja fiar-na’in.
Igreja sinodál ida
Ba imi hotu, maun-alin sira Roma nian, Itália nian, mundu tomak nian, ita hakarak sai Kreda sinodál, Kreda ne’ebé la’o, Kreda ne’ebé buka nafatin dame, ne’ebé buka nafatin karidade, ne’ebé koko nafatin atu besik liuliu ba sira ne’ebé terus.
Orasaun ba Maria
Ohin mak loron Suplikasaun ba Na’i-Feto Pompeia nian. Ita-nia Inan Maria hakarak nafatin la’o hamutuk ho ita, besik, tulun ita ho ninia intersesaun no ninia domin.
Tan neʼe, haʼu hakarak halo orasaun hamutuk ho imi. Mai ita reza hamutuk ba misaun foun ida-ne’e, ba Kreda tomak, ba dame iha mundu no mai ita husu grasa espesiál ida-ne’e ba Maria, ita-nia Inan. Ave Maria…
