Sidade Vaticano – Papa Francisco hahú iha kuarta, 13 Juñu, siklu foun katekeze nian kona-na Ukun-Fuan sira. Iha ninia reflesaun dahuluk, Papa Francisco halo introdusaun ida ba asuntu ne’e, hodi konsentra iha morsi nakonu.
Evanjellu Marcos nia pasajen ida hatudu pergunta husi joven ida: oinsá hetan moris rohan-laek. “Iha pergunta ne’e iha dezafiu ezisténsia ida-idak nian, ita-nian mós: dejezu ba moris nakonu, rohan-laek. Maibé oinsá halo atu to’o iha-ne’ebá? Dalan ida-ne’ebé mak atu tuir?”, Amu-Papa husu.
Durante reflesaun, Amu-Papa mensiona ho modu espesiál joven sira, ne’ebé dalabarak buka atu moris maibé remata hodi harahun sira nia an tanba halai tuir sasán sira ne’ebé folin-laek. “Foin-sa’e nia moris mak la’o bá oin, lahakmatek, lahakmatek saudavel, kapasidade atu la kontente ho moris ida lahó beleza, lahó kor. Se foin-sa’e sira la hamlaha ba vida auténtika, ha’u husu, umanidade sei bá loos iha-ne’ebé?”.
Iha resposta ba pergunta ba mane ne’ebé husu iha Evanjellu, Jezús hatudu ukun-fuan sira no temi parte ida ‘Decálogo’ nian. Tuir Amu-Papa, ne’e mak prosesu pedagójiku ida ne’ebé Jzús uza atu gia ba fatin presizu ida.
Husi mane ne’e nia pergunta ba Jezús, Papa Francisco hateten katak bele haree momoos katak nia la iha moris nakonu, nia lahakmatek, nia buka atu iha liután. No Jezús nia konvite finál ko’alia kona-ba rikusoin loloos nian: “Buat ida de’it mak ó sei kuran: bá, faan buat hotu ne’ebé ó iha no fó ba ema kiak sira, no ó sei hetan rikusoin iha lalehan. Hafoin mai no tuir ha’u”.
“Ema sé mak, bainhira bele hili entre buat ruma orijinál no ninia kópia ida, hili fali kópia? Ne’e mak dezafiu: hetan orijinál moris nian, la’ós kópia. Jezús la oferese substitutivu sira, maibé moris loloos, domin loloos, rikusoin loloos!”.
Papa Francisco remata reflesaun hosi esplika katak buat ne’ebé falta liuhusi buat ne’ebé iha. “Jezús la mai halakon Lei ka Profeta sira, maibé mai lori kumprimentu. Ita tenke hahú husi realidade atu halo haksoit ‘ba buat ne’ebé falta’. Ita tenke buka ordináriu atu loke an ba estraordináriu”.
