Sidade Vaticano – Papa Francisco iha kuarta 23 Maiu, hahú siklu foun katekeze nian dedika ba Sakramentu Konfirmasaun ka Krisma.
“Depoizde katekeze kona-ba Batizmu, loron hirak tuir solenidade Pentekostes konvida ita atu reflete kona-ba testemuñu ne’ebé Espírito hamosu iha batizadu sira, hodi koloka sira-nia moris iha movimentu, loke sira ba ema seluk nia di’ak”, Papa Francisco hateten bainhira hahú reflesaun.
Amu-Papa esplika katak sakramentu ne’e hanaran “Konfirmasaun” tanba konfirma Batizmu no reforsa ninia grasa, no mós koñnesidu nu’udar “Krisma” tanba ita simu Espíritu liuhusi kose mina “Krisma”, mina ne’ebé bispu mak konsagra. “Lahó Espíritu Santu nia forsa ita labele halo buat ida: Espíritu mak haraik forsa atu la’o bá oin”, nia subliña.
Solenidade Pentekostes, ne’ebé selebra iha domingu 20 Maiu liubá, sai ba Igreja buat ne’ebé Kristu unsaun Espíritu nian simu iha mora Jordão. Nune’e, Pentekostes mak impulsu misionáriu atu gasta ita-nia moris ba ema sira nia santifikasaun no ba Maromak nia glória.
“Espíritu horik iha ita-nia fuan, ita-nia klamar. Espíritu mak gia ita iha moris atu ita sai masin no roman justu ba ema sira. Se iha Batizmu Espíritu Santu imerje ita iha Kristu, iha Konfirmasaun, Kristu mak enxe ita ho ninia Espíritu, hodi konsagra ita nu’udar nninia testemuña sira, partisipa iha prinsípiu hanesan moris no misaun nian, hodi tuir Aman Lalehan ninia planu”, Amu-Papa remata.
