RV – Papa Francisco hahú iha kuarta, 13 Janeiru, siklu katekeze nian kona-ba mizerikórdia. Santu Padre aborda asuntu ne’e hodi tuir perspetiva bíblika, hodi nune’e aprende mizerikórdia husi buat ne’ebé Maromak rasik hanorin ho ninia Liafuan.
Papa Francisco hahú husi Testamentu Tuan, ne’ebé prepara revelasaun totál Jezús nian. Sagrada Eskritura aprezenta Na’i nu’udar “Maromak mizerikordiozu”, naran ne’ebé revela nia futar oin no fuan.
Liafuan “Na’i mizerikordiozu” evoka atitude ida ternura nian, Papa Francisco dehan, hanesan inan ida nia hahalok ho nia oan sira. “Ilas ne’ebé sujere mak Maromak ida ne’ebé komove tanba ita hanesan inan ida bainhira ko’us nia oan, hakarak de’it mak hadomi, proteje, tulun, pronta atu fó hotu, to’o nia an rasik mós”.
Ilas seluk ne’ebé Sagrada Eskritura aprezenta kona-ba Maromak, Amu-Papa esplika, mak piedade, katak ida-ne’ebé iha kompaixaun no, iha ninia grandeza, hakruuk ba sira ne’ebé fraku no kiak liu, prontu nafatin atu akolle. Aleinde ne’e, neineik atu hirus, eh pasiente. No ikusmai, Maromak ne’ebé haklaken nia an boot iha domin no fidelidade, no tuir Papa Francisco ne’e mak definisaun furak ida.
“Iha ne’e iha buat hotu. Basá Maromak boot no kbiit-na’in, maibé grandeza no kbiit ne’e hatudu liuhusi domin mai ita, ita-ne’ebé ki’ik loos, kbiit-laek loos. Liafuan “domin” ne’ebé utiliza iha-ne’e indika afetu, grasa, bondade. La’ós domin telenovela nian…Domin ne’ebé halo ain-hakat dahuluk, ne’ebé la depende iha méritu umanu sira, maibé ba gratuidade boot liu”.
Amu-Papa fó hanoin ba sarani sira katak Maromak fiél iha ninia mizerikórdia no prezensa ida sólida no estável, no ida-ne’e mak serteza fiar nian. “Entaun, iha Jubileu Mizerikórdia nian, ita konfia totalmente ba Nia no ita esperimenta ksolok tan Maromak mizerikordiozu no piedozu hadomi ita, neineik atu hirus no boot iha domin no fidelidade”.
