RV – Iha katekeze anteriór sira, Papa Francisco ko’alia kona-ba frajilidade ruma kondisaun umana nian, hanesan pobreza, moras no mate. Maibé ohin nia hakarak dedika an ba frajilidade sira ne’ebé eziste iha família rasik nia laran no, envezde esprime domin lori fali atu hamate ambiente familiár. Ida mak konflitu ideia nian entre kazál sira monu ba oan sira.
“Bainhira adultu sira lakon ulun, bainhira ema ida-idak hanoin de’it an rasik, bainhira aman no inan baku malu, oan sira nia klamar terus maka’as, sira sente dezesperadu. No ita? Maski ita-nia sensibilidade, evolui maka’as, parese ke ita sai anestiziadu iha kanek kle’an sira iha labarik sira nia klamar”.
Tanba buat hotu iha família liga malu, Francisco esplika katak bainhira kazál hanoin demais ninia ezijénsia rasik liberdade no gratifikasaun nian, distorsaun ne’e hakanek oan sira nia fuan no moris: “Iha família, buat hotu liga malu: bainhira ó-nia klamar kanek iha pontu naran ida, infesaun ne’e daet hotu. No bainhira mane id ano feto ida, ne’ebé empeñ aan atu sai ‘isin ida de’it’ no atu forma família ida, hanoin obsessivamente sira-nia ejizénsia rasik liberdade no graitifikasaun nian, distorsaun ne’e afeta profundamente oan sira nia fuan no moris”.
Papa Francisco insiste katak “Ita tenke komprende didi’ak buat ne’e: la’en no feen mak isin ida de’it; maibé sira-nia kriatura sira mak isin husi sira-nia isin. Bainhira hanoin ba adverténsia maka’as Jezús halo ba adultu sira atu keta eskandaliza ki’ik-oan sira, ita bele komprende kdi’ak liután ninia liafuan kona-ba responsabilidade boot atu salva vínkulu konjugál ne’ebé fó inísiu ba família umana. Bainhira mane no feto sai isin ida de’it, kanek hotu no aman-inan nia abandonu hotu inside iha oan sir ania isin moris nian”.
Papa Francisco resalta katak iha kazu separasaun nian ne’ebé labele evita; dalaruma, moralmente presiza duni, bainhira tenke salva par ne’ebé frajil liu, eh oan ki’ik sira, husi kanek mai husi arrogánsia no violénsia, husi hatuun ema no esplorasaun, husi indiferensa.
Remata katekeze, Papa Francisco destaka kestaun akompañamentu pastorál kazál sira-ne’ebé haketak malu, pontu ida ne’ebé debate dalabarak iha Sínodu Estraordináriu (Outubru 2014) kona-ba Família. Kestaun ne’e sei hetan atensaun mós iha enkontru sinodál fulan Outubru mai ne’e.
“Hale’u ita, iha família barak ne’ebé moris iha situasaun ita hanaran ‘irregular’ (liafuan ne’ebé ha’u la gosta). Ita husu: Oinsá ita bele ajuda sira? Oinsá ita akompaña sira atu oan sira la sai ‘reféns’ [sandera] aman no inan nian? Ita husu Na’i fiar boot ida atu hateke ba realidade ho Maromak nia matan; no karidade boot, atu hakbesik ba ema sira-ne’e ho fuan laran-sadia nian”.
