RV/Redasaun – Iha domingu ne’ebé selebra Loron Misionária Mundiál, katak 22 Outubru, Papa Francisco proklama Fulan Misionáriu Estraordináriu iha Outubru 2019, “ho objetivu atu fanun ho sasukat boot liután konxiénsia kona-ba missio ad gentes no foti impulsu foun iha transformasaun misionária iha moris no iha pastorál”.
Anúnsiu ne’e ita hetan iha Surat dirije ba kardeál Fernando Filoni, prefeitu “Congregação para a Evangelização dos Povos”, dikasteru ne’ebé propoin insiativa ida-ne’e no sei haree ba ninia preparasaun. Papa Francisco fó sai tiha ona ninia intensaun ida-ne’e bainhira hasoru partisipante sira iha Asembleia jerál “Pontificie Opere Missionarie” sira.
Amu-Papa husu ba sarani sira atu iha “tebes duni iha fuan anúnsiu Evanjellu nian no sira-nia komunidade nia konversaun iha iha realidade misionária no evanjelizadora sira” atu nune’e “aumenta liután domin ba misaun, katak «paixaun ida ba Jezús maibé, tempu hanesan, paixaun ida ba ninia povu»” hanesan S. João Paulo II afirma.
Papa Francisco fó hanoin katak iha 30 Novembru 2019 “sei selebra sentenáriu promulgasaun Surat apostólika ‘Maximum illud’, ho surat ida-ne’e Papa Bento XV hakarak fó impulsu misionáriu foun ba responsabilidade misionária atu haklaken Evanjellu. Tinan ne’ebá mak tinan 1919: iha konflitu mundiál boot ida nia rohan, ne’ebé nia rasik define nu’udar «masakre inutil», Papa Bento XV haree nesesidade atu kualifika hikas misaun iha mundu ho modu evanjéliku, atu bele purifika husi ferrujen koloniál sira no hadook nia husi ambisaun nasionalista no espansionista sira ne’ebé hamosu dezastre barak. «Maromak nia Kreda mak Kreda universál, la’ós estranjeiru ba povu ida», nia hakerek, hodi ezorta mós atu rejeita forma hotu interese nian, basá razaun mesak de’it ba misaun mak anúnsiu no karidade Na’i Jezús nian, ne’ebé habelar liuhusi santidad emoris nian no ho hahalok di’ak. Nune’e, Bento XV fó impulsu espesiál ba missio ad gentes, hodi esforsa, ho instrumentu konseituál no komunikativu sira uza iha tempu ne’ebá, atu fanun, liuliu iha kleru sira, konxiénsia kona-ba devér misionáriu”.
“Nia – Papa Francisco hakerek – hatán ba Jezús nia konvite rohan-laek: «Imi bá mundu tomak no haklaken Evanjellu ba kriatura hotu» (Mc 16,15). Adere ba Na’i nia orden ida-ne’e la’ós opsaun ida ba Kreda: ne’e mak nia «knaar obrigatóriu», hanesan Konsíliu Vaticano II fó hanoin, basá Kreda «nia natureza mak misionária»”.
Iha Angelus domingu ne’e nian, Amu-Papa fó hanoin katak iha domingu ne’e ita selebra Loron Misionária Mundiál, ho tema “Misaun iha Kreda nia fuan”. “Ha’u husu imi hotu – nia hatutan – atu moris ksolok misaun nian hodi fó sasin Evanjellu nian iha ambiente sira ne’ebé imi ida-idak moris no serbisu bá. Tempu hanesan, ita simu bolun atu fó apoiu ho afetu, tulun konkretu no orasaun ba misionáriu/a sira ne’bé bá atu haklaken Kristu ba ema sira ne’ebé seidauk koñese Nia”. No nia remata: “Iha loron ne’ebé selebra memória litúrjika S. João Paulo II nian, Papa misionáriu, ita entrega ba ninia intersesaun Kreda nia misaun iha mundu”.
