Hodi halo komenta kona-ba liturjia ohin nian kona-ba inísiu misaun públika Jezús nian, Amu-Papa iha Angelus konvida sarani sira atu ultrapasa tentasaun taka an nian. Nia subliña katak “Mesias mai hosi Israel, maibé nia ultrapasa nia rai rasik nia fronteira sira hodi haklaken Maromak ne’ebé hakbesik ba ema hotu, ne’ebé la esklui ema ida, ne’ebé la mai de’it ba ema ne’ebé moos maibé, liuliu, kahur ho situasaun no relasaun umanu sira.”
«Evanjellu husu ita atu foti risku konfiansa nian».
Haree ba Jezús nia hilin sira tulun ita atu komprende katak sarani sira labele taka sira-nia an iha fatin eskluzivu no “protejidu” maibé hetan bolu atu hakat liu baliza sira, hanesan Mesias halo. Ida-ne’e mak Amu-Papa nia mensajen iha katekeze Angelus loron, 25 Janeiru 2026. Nia hahú hodi konsidera iha ne’ebé no bainhira maka misaun públika Maromak nia Oan-Mane nian hahú.
Maromak serbisu iha tempu ida-idak
Jesus deside atu hahú nia haklaken bainhira rona notísia kona-ba João Batista ne’ebe ema kaer. Nia deside atu la hela metin, maibé atu la’o rasik iha situasaun ida ne’ebé sujere prudénsia. Nia lori “notísia di’ak” kona-ba Reinu Maromak nian ne’ebé besik ona, bainhira tempu sira nakukun, bainhira rezisténsia interior sai lejítimu. Pontífise nia ezortasaun mak atu halo Jezús nia estilu sai ita-nian rasik, atu iha aten-barani, no la adia hakaran atu haklaken Kristu to’o tempu sira ne’ebé favoravel liu.
Risku, maski nune’e, maka atu hela metin iha indesizaun ka dadur prudénsia nian ida ne’ebé maka’as liu, enkuantu Evanjellu husu ita atu foti risku konfiansa nian: Maromak serbisu iha tempu hotu-hotu, no momentu hotu di’ak ba Na’i, maski ita la sente prontu ka situasaun ladun favorese.
Maromak la esklui ema ida
Jezús Nia misaun públika hala’o iha Kafarnaum, iha Galileia, iha “territóriu multikulturál ne’ebé liuhosi ema ho orijen no apartenensia relijioza oioin”, Amu-Papa esplika. Ida-ne’e sujere konvite ida atu sai hosi ita-nia zona konfortu, “iha ksolok atu hatene,”Papa konklui, “katak tempu no fatin hotu-hotu iha ita-nia moris hetan vizita husi Nia no nakonu ho Ninia domin.”
Evanjellu hateten mai ita katak Mesias mai husi Israel, maibé ultrapasa limite husi ninia rai nian, hodi haklaken Maromak ne ebé hakbesik ba ema hotu, ne ebé la esklui ema ida, ne ebé la mai de it ba ema neebé moos maibé, liuliu, kahur ho situasaun no relasaun umanu sira. No Ita sarani sira mos, tenke manán tentasaun taka-an nian: Evanjellu tenke haklaken no moris iha sirkunstánsia hotu-hotu no iha ambiente hotu-hotu, atu nune’e bele sai fermentu fraternidade no dame nian entre indivíduu sira, kultura sira, relijiaun sira no povu sira.
Fonte: Vatican News
