Iha Angelus iha Prasa São Pedro nian, Papa Leao XIV esplika katak la to’o atu hala’o “aktu relijiozu sira se la transforma fuan.” “Ita-nia fiar auténtiku bainhira hatene hakuak ita-nia moris tomak, bainhira nia sai hanesan kritériu ida ba ita-nia hilin sira”. Kristu “hadomi ita to’o liu hosi ‘odamatan kloot krús nian.” Imita Nia dalaruma signifika halo “hilin difisil no la popular, luta hasoru egoízmu rasik, no gasta an ba ema seluk.”
Haka’as-an atu «tama liuhusi odamatan kloot»: ida-ne’e mak konsellu ne’ebé Jezús oferese ba sira ne’ebé husu ba nia «se ema uitoan de’it mak hetan salvasaun». Parese oferese mai ita imajen diferente ida kona-ba “Aman domin nain no mizerikórdia nian” ho nia liman nakloke nafatin “hodi simu ita”. Iha realidade, Kristu nia liafuan sira sai hanesan avizu ida ba sira ne ebé hanoin katak sira mak sarani perfeitu no mós hanesan lembransa ida kona-ba difikuldade no sakrifísiu sira ne ebé tenke hasoru bainhira halao dalan evanjéliku.
Na’i lakohi halo ita laran nakraik. Envezde ninia liafuan sira, serve liuliu atu book prezunsaun hosi sira ne’ebé hanoin katak sira hetan ona salvasaun, hosi sira ne’ebé pratika relijiaun tanba ne’e, sente buat hotu loos ona. Iha realidade, sira seidauk komprende katak la to’o hala’o aktu relijiozu sira se sira rasik la transforma fuan: Na’i lakohi adorasaun haketak husi moris no la apresia sakrifísiu no orasaun sira se sira lalori ita atu moris iha domin ba ita-nia maun-alin sira no atu pratika iha justisa.
Papa Leão XIV esplika katak sira ne’ebé laiha domin loos ba sira-nia maluk, bainhira sira “aprezenta an iha Na’i nia oin hodi gaba-an katak han no hemu hamutuk ho Nia no rona Ninia hanorin sira, Nai sei hatán ba sira nune’e: “Ha’u la hatene imi mai husi ne’ebé. Hadook an husi ha’u, imi hotu ne’ebé pratika injustisa!”
Enkuantu dalaruma ita julga sira ne’ebé dook hosi fiar, Jezús dezafia “seguransa fiar-na’in sira-nian”. Loos duni, nia hateten mai ita katak la to’o atu profesa ita-nia fiar ho liafuan, han no hemu hamutuk ho Nia hodi selebra Eukaristia, ka hatene didi’ak hanorin sarani sira. Ita-nia fiar auténtika bainhira hakuak ita-nia moris tomak, bainhira sai kritériu ba ita-nia hilin sira, bainhira halo ita sai feto no mane ne’ebé kompromete an ba buat di’ak no foti risku iha domin, hanesan Jezús halo.
Amu-Papa esklarese: Saida maka Kristu hili la’ós “dalan fásil ba susesu ka podér”. Loos duni, “atu bele salva ita, nia hadomi ita to’o nia liu hosi ‘odamatan kloot krús nian.” Tanba ne’e, Jezús “mak ita-nia fiar nia sasukat”, “odamatan ne’ebé ita tenke liu atu hetan salvasaun”, no ida-ne’e “hodi moris ninia domin rasik no sai, ho ita-nia moris, traballadór justisa no dame nian”.
Viajen sarani nian, ho liafuan badak, envolve “hili sira ne’ebé maka todan no ladún popular, luta hasoru egoízmu rasik no fó an ba ema seluk”, no “persevera iha di’ak” bainhira ” karik lójika aat sira koko atu manán”. Maibé ho dalan ida-ne’e de’it, “ita sei deskobre katak moris loke iha ita-nia oin ho modu foun” no “ita sei tama iha Maromak nia fuan ne’ebe luan” no mós “iha ksolok festa rohan-laek nian ne’ebé Nia prepara mai ita”. Tanba ne’e maka konvite atu invoka Maria “atu tulun ita ho aten-barani liuhosi odamatan kloot Evanjellu nian,” no atu “loke ita-nia an ho ksolok ba Maromak Nia domin”.
Fonte: Vatican News
