Festa Batizmu Jezús nian, ne’ebé ohin ita selebra, marka inísiu Tempu Ordináriu nian: períodu ida-ne’e tinan litúrjiku nian konvida ita atu tuir Na’i hamutuk, rona ninia Liafuan, no imita ninia jestu domin nian ba ema seluk. Nune’e mak ita konfirma no hafoun ita-nia Batizmu, Sakramentu ne’ebé halo ita sai sarani, liberta ita husi sala no nakfilak ita ba Maromak nia oan sira, liuhusi kbiit ninia Espíritu moris nian.
Evanjellu ne’ebé ohin ita rona haktuir fali oinsá mak sinál efikás grasa nian ne’e moris. Bainhira nia simu batizmu husi João iha mota Jordaun, Jezús haree «Maromak nia Espíritu tun mai hanesan manu-pombu ida no tun iha nia leten» (Mt 3,16). Iha tempu hanesan, lalehan nakloke ita rona Aman nia lian dehan: «Ida-ne’e mak ha’u-nia Oan doben» (v. 17). Nune’e Trindade tomak sai prezente iha istória: hanesan Oan-Mane tun ba bee Jordaun nian, nune’e mós Espíritu Santu tun ba Nia, liuhusi Nia, haraik mai ita nu’udar forsa salvadór.
Doben sira, Maromak la hateke mundu hosi dook, la kona ita nia moris, ita nia susar sira, no ita nia esperansa sira! Nia mai iha ita-nia leet ho matenek husi ninia Liafuan ne’ebé sai isin, envolve ita iha planu domin nian ne’ebé surpreendente ba umanidade tomak.
Ne’e mak João Batista, nakonu ho hakfodak, husu ba Jezús: “Ó mai hasoru ha’u?” (v. 14). Sin, iha ninia santidade Na’i fo an atu simu batizmu hanesan ema sala-na’in seluk, atu hatudu Maromak Nia mizerikórdia rohan-laek. Oan-Mane Mesak, iha ne’ebé ita sai maun-alin, mai atu serbí no la’ós atu domina, atu salva no la’ós atu kondena. Nia mak Kristu Redentór: Nia foti ba Nia buat ne’ebé ita nian, inklui sala, no haraik mai ita buat ne’ebé Ninian, katak, grasa moris foun no rohan-laek nian.
Sakramentu Batizmu realiza eventu ida-ne’e iha tempu no fatin hotu, hodi introdús ita ida-idak iha Kreda, ne’ebé mak Maromak nia povu, ne’ebé forma husi mane no feto husi nasaun no kultura hotu-hotu, ne’ebé rejenera husi ninia Espíritu. Entaun mai ita dedika loron ida-ne’e hodi hanoin hikas prezente boot ne’ebé ita simu, hodi kompromete ita-nia an atu fó sasin kona-ba ida-ne’e ho ksolok no konsisténsia. Ohin de’it ha’u sarani kosok-oan balun ne’ebé foin moris, ne’ebé sai ita-nia maun-alin foun sira iha fiar: furak oinsá atu selebra nu’udar família ida de’it Maromak nia domin, ne’ebé bolu ita ho naran no liberta ita husi buat aat! Sakramentu dahuluk mak sinál sagradu ne’ebé akompaña ita ba nafatin. Iha oras nakukun, Batizmu mak naroman; iha konflitu sira moris nian, Batizmu mak rekonsiliasaun; iha oras mate nian, Batizmu mak odamatan lalehan nian.
Hafoin Angelus
Maun-alin doben sira,
Hanesan ha’u temi tiha ona, ohin dadeer—tuir lisan Festa Batizmu Jezús nian—ha’u sarani kosok-oan balun ne’ebé foin moris, funsionáriu Santa Sé nia oan sira. Agora ha’u hakarak hato’o ha’u-nia bensaun ba labarik sira hotu ne’ebé simu ka sei simu Batizmu iha loron hirak ne’e, iha Roma no iha mundu tomak, hodi entrega sira ba Virjen Maria nia protesaun materna. Ha’u reza liuliu ba labarik sira ne’ebé moris iha kondisaun difisil liu, tantu iha termu saúde no perigu esternu sira. Atu grasa Batizmu nian, ne’ebé halibur sira ba Kristu nia Mistériu Paskál, serbisu ho efetivu iha sira no iha sira-nia família.
Ha’u nia hanoin diriji ba akontesimentu iha loron hirak ne’e iha Médiu Oriente, partikularmente iha Iraun no Síria, iha ne’ebé tensaun persistente sira kauza ema barak nia mate. Ha’u harohan atu diálogu no dame sei kuda ho pasiénsia, hodi buka di’ak komún sosiedade tomak nian.
Iha Ukránia, atake foun sira, partikularmente grave, ne’ebé dirije ba infraestrutura enerjétika, afeta maka’as populasaun sivíl, hanesan tempu malirin sai maka’as liután. Ha’u reza ba sira ne’ebé maka terus no hafoun ha’u nia apelu atu hapara violénsia no intensifika esforsu sira atu hetan dame.
Ha’u dezeja ksolok Domingu nian ba imi hotu!
Fonte: Vatican.Va
