“Mai ita reza atu ita ida-idak bele hetan konsolasaun iha ita-nia relasaun pesoál ho Jezús no aprende husi ninia fuan laran-sadia ba mundu.” Ba dala uluk, Papa Leão XIV introdús intensaun orasaun nian ba fulan Juñu iha lian Inglés, iha mensajen vídeo ne’ebé fó sai iha loron 3 Juñu, hosi Rede Orasaun Mundiál Amu-Papa nian. Ba fulan ida-ne’e, ne’ebé tradisionalmente dedika ba devosaun ba Jezús nia Futar Fuan Santu, Pontífise husu ba sarani sira atu koñese pesoalmente Kristu nia domin, atu nune’e bele habelar ba ema hotu no liuliu konsola sira ne’ebé terus, iha mundu ne’ebé dalabarak marka ho divizaun, dezigualdade no pobreza. Liutiha liafuan sira Papa Leão XIV nian, lian seluk reza orasaun ida ne’ebé seidauk publika ne’ebé dedika ba Sagradu Fuan atu akompaña sarani sira iha sira-nia meditasaun.
“Na’i, ohin ha’u mai husi Ita-nia fuan ne’ebé kmaus” mak insípiu orasaun nian, “husi Ita-Boot ne’ebé nasulin laran-sadia ba ki’ik sira no kiak sira, ba sira ne’ebé terus no ba ema nia susar hotu”.“Ita-Boot hatudu mai ami Aman nia domin hodi hadomi ami lahó sasukat ho Ita-nia fuan, divina no umanu”. “Fó ba ó-nia oan sira hotu grasa atu hasoru ó” no hafoin “haruka ami ba misaun ida: – orasaun konklui – misaun kompaixaun nian ba mundu, iha-ne’ebé ó mak bee-matan ne’ebé suli konsolasaun hotu”.
Devosaun ba Jezús nia Fuan Sagradu dezenvolve iha sékulu XVII ho revelasaun sira ba Santa Margarida Maria Alacoque no ninia interpretasaun hosi jezuíta Santa Claude de La Colombière. Amu-Papa Pio IX proklama festa Sagrado Coração nian iha tinan 1856 no depois, Leão XIII, husi ne ebé Pontífise atuál foti nia naran, reforsa ninia importánsia hodi hasa e ba solenidade ida iha tinan 1889. Tuirmai nia hakerek ensíklika Annum sacrum iha tinan 1899 iha-ne ebé nia konsagra ba Jezús nia Fuan tomak. Amu-Papa oioin, hanesan Pio XI no Pio XII, dedika ensíklika sira ba devosaun ida-ne’e. Foin lalais ne’e iha 2024, Francisco publika Dilexit nos, iha ne’ebé nia propoin Kristu nia Fuan nu’udar resposta ba kultura no indiferensa ne’ebé soe de’it.
Orasaun:
Na’i, ohin ha’u mai hosi Ita-boot nia fuan laran-sadia:
husi ita-boot ne’ebé iha liafuan sira ne’ebé halakan ha’u nia fuan,
husi ita-boot neʼebé hatudu laran-sadiʼa ba ema kiʼik no kiak sira,
iha sira ne’ebé terus no iha ema nia susar hotu.
Ha’u hakarak koñese liután ita-boot, atu kontempla ita-boot iha Evanjellu,
atu hamutuk ho ita-boot no aprende husi ita-boot
no husi karidade ne’ebé ita-boot husik atu bele sente
husi forma hotu-hotu pobreza nian.
ita-boot hatudu Aman nia domin mai ami hodi hadomi ami la ho sukat
ho ita-boot nia fuan, Divinu no umanu.
Haraik ba Ita-boot nia oan sira hotu grasa enkontru nian ida ho Ita-boot.
Muda, forma no transforma ami-nia planu sira,
atu nune’e ami bele buka de’it Ita-boot, iha sirkunstánsia hotu-hotu:
iha orasaun, iha serbisu, iha enkontru no iha ami-nia moris loroloron nian.
Husi enkontru ida-ne’e, haruka ami ba misaun:
misaun ida kompaixaun nian ba mundu,
iha ne’ebé ita-boot maka fonte ne’ebé konsolasaun hotu suli.
Amen.
(Video Orasaun nian) https://www.youtube.com/watch?v=VHU44aAcOsY
Vatican News
