Dili – Komisaun Ezekutiva Saúde ba Surtu COVID-19 nia membru balun, kompostu husi Dr. Odete Viegas (DG), Dr Nívio (Pilár 5), no Señór Ivo (Pilár 2) ohin, 9 Juñu ,halo diseminasaun informasaun kona-ba moras covid-19 no vasina covax ba pároku no relijiozu/a sira iha salaun dioseze Dili nian, iha Lecidere.
Pontu sira aprezentasaun nian kona-ba istória covid-19 nian, situasaun atuál, estratéjia intervensaun Timor-Leste nian, análize epidemiolojia nian iha Timor-Leste no introdusaun ba vasina no importánsia covax nian.
Ita hotu hatene rona ona saida mak coronavirus ne’ebé mosu uluk iha Wuhan (Xina), husi kedas tinan 2019 nia rohan, hafoin sai pandemia iha 2020 to’o ohin loron. Virus ne’e hadaet liuhusi kaben ne’e sai bainhira em amear, hasai kaben tasak ka hasai iis. Ema hotu bele hetan infesaun ne’e bainhira inspira virus ne’e se besik ema ho moras covid-19 eh kona sasán ne’ebé infetadu no hafoin, kose ba matan, inus eh ibun.
Timor-Leste deteta kazu pozitivu dahuluk iha 21 Marsu 2020 importadu, no dekreta Estadu Emerjénisa ba fulan tolu no kriasaun sala jestaun krize. Iha 2020 ita iha kazu pozitivu 32. Tinan 2021, kazu infesaun sai maka’as bainhira viziñu sira Timor nia sorin bá sai maka’as no lori, liuhusi fronteira mai TL. Dadu sira kona-ba kazu ativu komulativu to’o loron 8 Juñu hamutuk 7862, kazu ativu 2115, óbitu 18.
Vasina
Vasina mak meiu ida atu hasa’e anti-korpu ka sistema imunizasaun iha isin. Timor-Leste uza vasina vaxzervia eh astrazeneca, lansa iha 7 Abríl 2021, tanba vasina ne’e tahan temperatura to’o 32 graus, enkuantu pfizer tenke malirin grau 0. Ita hetan apoiu 20% vasina husi Austrália no governu tenke sosa 80 %. Xina mós ajuda sinovax ne’ebé foin simu iha fulan Juñu ne’e. Vaxzervia simu ho doze rua: doze dahuluk proteje to’o 76% no doze daruak proteje to’o 82 %. Intervalu husi doze dahuluk no daruak mak semana 8-12. Aban, 10 Juñu sei hahú implementasaun vasina doze daruak iha Dili no 14 Juñu iha munisípiu 12 sira seluk.
Simu vasina doze rua tulun atu hetan protesaun di’ak no isin bele hetan imunidade di’ak liu hasoru infesaun. Iha vasina dahuluk ita presiza semana tolu atu vasina funsiona, iha doze daruak ita presiza semana rua atu vasina proteje kompletu. Se karik ita infetadu depoizde vasina dahuluk, ita di’ak tiha ita tenke bá simu doze daruak. Kona-ba efeitu sira vasina nian, ita hotu hetan informasaun husi sentru vasina, no mós hakerek iha kartaun vasina nian.
Papél Igreja nian
Ekipa mitigasaun covid-19 husu atu Igreja s
ai ajente mudansa nian, fó apoiu ba governu no komunidade atu hakotu propagasaun covid-19; sai fonte informasaun loos nian hodi hapara hoax sira; sai komunikadora ne’ebé hatutan informasaun kona-ba covid-19 ba sarani sira no komunidade; sai dinamizadora, motór ne’ebé dinamiza mudansa moris nian iha sosiedade; sai promotora saude nian, hodi promove hahalok saudavel iha sarani sira no komunidade nia leet.
Parte ikus enkontru nian fó ba diálogu ho pergunta no resposta no mós sujestaun sira. Atu bele hetan informasaun kona-ba covid-19 iha Timor-Leste bele liga ba liña telefone 119, asesu ba social media Pálacio das Cinzas no WHO TL.
(Redasaun fmatin)
