Baucau – Oratóriu mak fatin ida iha ne’ebe oratorianu sira bele sente nu’udar sira nia uma segundu, iha klima ksolok, paz, espontaneidade, amizade no iha espíritu família nian. Sai mós fatin ida atu haburas sira nia fiar nu’udar sarani no nu’udar ema liuhusi atividade sira ne’ebé hala’o iha oratóriu hanesan: Reza, katekeze, jogu sira, múzika, teatru no paseiu.
Tan ne’e iha loron 6 domingu, oratorianu sira husi V klase to’o sekundária ho animadór/a sira hamutuk 35 no ho Ir. Jacinta de Deus no Ir. Alice ba paseiu iha Quelicai. Sai husi Baucau 7. 30 no to’o iha Quelicai 9. 30, konsege tuir missa maske iha tiha ona omilia. Depoizde missa merenda hamutuk, hafoin kontinua ho animasaun ( disko, dansa besekem, penguin dance, dansa kultura).
Han meudia iha refeitóriu hamutuk ho larista sira na’in 16 ho sira-nia frater. Tuir mai deskansa uitoan hafoin kontinua ho orasaun agradesimentu nian badak hamutuk ho larista sira. No ikus liu, aprezentasaun husi oratorianu sira no husi animadór/a sira no mós husi larista sira ba oratorianu sira. Molok atu fahe malu dala ida tan halo animasaun hamutuk ho larizta sira. Objetivu ba paseiu ne’e, atu agradese ba Maromak ba grasa hotu ne’ebe simu durante ne’e no agradese ba malu ba buat hotu ne’ebé fahe ba malu iha oratóriu. Sira hotu kontente tanba hare igreja Quelicai maski dalan ladún di’ak.
(Alice Filipe)
