Venilale – Enkontru juniores fulan ida ne’e reflete kona ba Animasaun Vokasional, formadora mak Me. Provincial Me. Alma Castagna, enkontru ida ne’e, hala’o iha Komunidade Madre Mazzarello, Venilale loron 17 – Agostu – 2018 hahu dader tuku 08.30 otl no remata iha lorokraik tuku 03.30 otl. Irman sira ne’ebé partisipa mak irman junioras husi komunidade hotu husi Timor laran, menus Irman sira ne’ebé iha Sumba Indonesia. Irman sira ne’ebé partisipa hamutuk 18.
Formasaun ida ne’e nia objetivu mak :
- Hafanu Empeñu atu fo sasin kona ba vokasaun, hodi esprime ita nia hola parte ba Jezús nia faxinu.
- Oferese indikasaun kona ba dimensaun vokasional Pastoral Juvenil FMA
- Fo posibilidade atu reflete kona ba kultura vokasional
- Fahe ideia bazeia ba realidade iha ne’ebé hela ba
- Sensibiliza kona ba akompañamentu vokasional foinsa’e sira nian.
Ba sesaun dahuluk nian madre Alma aprezenta kona ba objetivu sira, hafoin fahe ba grupo atu lee no reflete hamutuk, Kona espasu Vitál ba animasaun vokasionál, ikus nian mak aprezentasaun iha asembleia. atu haklean liu tan kona ba subtópiku sira, irman sira sei fahe sira nia reflesaun ruma:
- Irman Maria Natalina: Ami nia grupo haklean kona ba pastoral Juvenil Vokasional atu akompaña foinsa’e feto sira halo dixernimentu liuliu sira ne’ebé hala’o ona esperiensia voluntaria iha komunidade sira no animasaun iha ambiente pastoral, oratorio, eskola, orfanatu hodi integra-an serbisu ba kiak sira no involve esperiensia sira hanesan animador, atividade MJS no kona ba Espiritualidade Salesiana. Halo akompañamentu konstante ne’ebé lori sira atu halo desizaun loos no motivasaun loos ba sira nia-an rasik tuir Maromak Nia planu.
- Irman Josefa Ricarda: konteudu ne’ebé ami nia grupo hakle’an kona ba konvinsaun pastoral ne’ebé tau abut iha praxis no simu konfirmasaun iha projetu Formativu no LOME, ne’ebé koalia kona ba oinsa eduka ho konfiansa total iha Maromak Nia prezensa hodi konsiente katak moris konsagrada iha tempu postmodernu mak posivel no liu-liu prepara kondisaun sira atu foinsa’e sira halo esperiensia kona ba Maromak hodi akompaña sira ho Amorevoleza no Autorevoleza.
- Irman Lurdes: Ha’u kontente tebes ho primeira formasaun Juniores nian ne’ebé ami partisipa ba dala uluk hamutuk ho irman sira seluk hodi fahe esperiensia sira husi komunidade ida-idak ne’ebé la hanesan hodi hariku malu, no hafanun ami atu fo sasin kona ba Jezús no akompaña foinsa’e sira ne’ebé ami hasoru iha misaun.
Molok atu remata enkontru ne’e, Me. Provinsial fahe imajen Maria Auxiliadora nian hodi hato’o mensajen badak, “ buat hotu ne’ebé ita reflete vale liu agora, ita nia moris komunidade no pastoral, bele hetan situasaun ruma ne’ebé halo ita konfuzaun no ita bele dehan tansa buat ne’e akontese, importante komprende ida ne’e mai husi Maromak ka buat ruma kontra Maromak, se Mai husi Maromak ha’u simu nu’udar dalan ne’ebé ha’u la komprende no simu nu’udar Maromak Nia sinal, nu’udar Juniores nunka hotu atu hanoin no reflete no konfronta-an ho vokasaun ida ne’e.
(Maria Sarmento Guterres)
