Iha Angelus domingu 24 Jullu, komenta Evanjellu Lc 11,1-13, Papa Francisco destaka importánsia orasaun nian nu’udar “instrumentu serbisu” nian no nu’udar “salvasaun moris” nian.
Maun no biin-alin sira, bondia!
Evanjellu domingu ne’e nian (Lc 11,1-13) loke ho Jezús ne’ebé harohan mesak, haketak an; bainhira nia hotu, dixípulu sira husu ba nia: «Na’i, hanorin ami harohan» (v. 1); no Nia hatán: «Bainhira imi harohan, dehan: “Aman…”» (v. 2). Liafuan ne’e mak “segredu” Jezús nia orasaun nian, xave ne’ebé Nia rasik fó mai ita atu ita mós tama iha relasaun diálogu konfidensiál ho Aman ne’ebé akompaña no tahan nia moris tomak.
Ba naran “Aman” Jezús liga pedidu rua: «halo ita-nia naran santu, halo ita-nia reinu to’o mai ami» (v. 2). Jezús nia orasaun, nune’e orasaun sarani, mak uluknanai fó fatin ba Maromak, husik Nia manifesta ninia santidade iha ita no hodi halo nia reinu avansa ba oin, hahú husi posibilidade atu ezerse ninia ukun domin nian iha ita-nia moris.
Pedidu tolu seluk kompleta orasaun ne’ebé Jezús hanorin, “Ami Aman”. Pedidu tolu ne’ebé esprime ita-nia nesesidade fundamentál sira: ai-han, perdaun no tulun iha tentasaun sira (kf vv. 3-4). Ita labele moris lahó ai-han, ita labele moris lahó perdaun no ita labele moris lahó Maromak nia tulun iha tentasaun sira. Ai-han ne’ebé Jezús halo ita husu mak ida nesesáriu de’it, la’ós ida naresin; ne’e mak ai-han ema peregrinu sira-nian, ema justu nian, ai-han ida ne’ebé la akumula no la soe lerek, ne’ebé la hatodan ita-nia marxa. Perduan mak, uluknanai, ida-ne’ebé ita rasik simu husi Na’i: konxiénsia kona-ba sai ema maksalak ne’ebé simu perdaun de’it husi Maromak nia laran-sadia rohan-laek mak bele halo ita iha kbiit atu kumpre jestu sira rekonsiliasaun fraterna nian Se ema ida la sente nia an ema maksalak ne’ebé simu perdaun, nia nunka bele halo jestu ida perdaun nian eh rekonsiliasaun nian. Hahú husi fuan iha-ne’ebé ema sente ema maksalak ne’ebé simu perdaun. Pedidu ikus, «keta husik ami monu ba tentasaun», esprime konxiénsia kona-ba ita-nia kondisaun, nafatin espostu ba lasu buat no korrupsaun nian, Ita hotu hatene saida mak tentasaun ida!
Jezús nia hanorin kona-ba orasaun kontinua ho ai-kanoik rua, iha-ne’ebé Nia foti nu’uda rmodelu belun ida nia atitude iha konfrontu ho belun seluk no ida aman ida-nian iha konfrontu ho nia oan (kfr vv. 5-12). Rua-rua hakarak hanorin ita atu iha konfiansa tomak iha Maromak, nu’udar Aman. Nia hatene di’ak liu ita-nia nesesidade sira liufali ita, maibé hakarak atu ita aprezenta ba nia ho barani no insisténsia, tanba ida-ne’e mak ita-nia modu atu partisipa iha ninia obra salvasaun nian. Orasaun mak “instrumentu serbisu” dahuluk no prinsipál iha ita-nia liman! Insiste ho Maromak la serve atu konvinse Nia, maibé atu haforsa ita-ania fiar no ita-nia pasiénsia, katak ita-nia kapasidade atu luta hamutuk ho Maromak ba sasán sira ne’ebé importante duni no nesesáriu. Iha orasaun ita ema rua: Maromak no ha’u atu luta hamutuk ba buat sira ne’ebé importante.
Entre sira-ne’e, buat boot importante ne’ebé Jezús dehan iha Evanjellu, maibé ita kuaze nunka husu, mak Espíritu Santu. “Haraik Espíritu Santu mai ha’u!”. No Jez’us dehan: «Se imi, ema aat, hatene fó buat di’ak ba imi-nia oan sira, imi-nia Amani ha lalehan sei fó Espíritu Santu ba sira ne’ebé husu!» (v. 13). Espíritu Santu! Ita tenke husu Espíritu Santu atu mai iha ita. Maibé Espíritu Santu serve ba saida? Serve atu moris di’ak, atu moris iha sabedouria no domin, hodi halo Maromak nia vontade. Orasaun furak sei sai, iha semana ida-ne’e, se ita ida-idak husu ba Aman: “Aman, haraik Espíritu Santu mai ha’u!”. Na’i-Feto hatudu tiha ona mai ita iha ninia moris, iha-ne’e Maromak nia Espíritu mak anima. Nia tulun ita atu harohan ba Aman hamutuk ho Jezús, atu moris la’ós iha maneira mundane, maibé tuir Evanjellu, ho Espíritu Santu nia matadalan».
