Dili – Ohin iha 7 Outubru ne’ebe kreda selebra memoria Nossa Senhora do Rosario, Eskola Maria Auxiliadora Comoro organiza hamutuk peregrinasaun hodi manan Induljensia ba tinan Jubileo Extraordinaria Missionaria. Nu’udar preparasaun ba peregrinasaun, Irman sira husu padre Salesiano sira hodi fo konfisaun ba alunu sira maske alunu hotu labele konfesa tanba Amululik ida de’it. Nune’e iha loron peregrinasaun ne’e ema hotu partesipa ho ksolok no ho devosaun boot. Peregrinasaun ne’e partesipa husi Irman sira, Professores, trabalhadores no Alunos sira husi 40 Ano to’o 90 Ano no mós Aman inan balun ne’ebe hakarak akompaña oan sira.
Peregrinasaun hahu dadeer tuku 04:30 husi Eskola Maria Auxiliadora to’o iha Katedral Nossa Senhora Imaculada Conceição Dili. Molok hala’o Peregrinasaun madre diretora Eskola Sr. Paulina Correia, FMA, fahe alunu sira ba grupu nune’e sira hotu la’o tuir grupu ne’ebe fahe ona no kada grupu akompaña husi Irman sira hamutuk Profesores da turma ida-idak. Durante iha peregrinasaun ema hotu la’o iha klima hakmatek iha ne’ebe tulun tebes ema ida-idak atu hala’o didi’ak orasaun Tersu tuir dalan ba to’o Katedral. Grupu hotu ne’ebe hala’o peregrinasaun to’o ho pontual iha Katedral nune’e iha tuku 07:30 komesa kedas selebrasaun Santa Missa tuir programa ne’ebe iha.
Missa ne’e Amo Vigario Parokia Katedral, Pe. Leandro Maria Alves Pr. mak selebra. Iha nia homilia padre hahu ho Anjo nia komprimenta ba Maria dehan: “Keta tauk Maria, basa O rahun diak tebes iha Maromak nia futar oin.” Padre dehan: Ohin dia 07 Outubro ita selebra festa Nossa Senhora do Rosario. Iha loron festa ida ne’e mos ita bolu naran Nossa Senhora das Vitorias. Tanba sa ita bolu Nossa Senhora do Rosario? Tanba iha Istoria badak deit katak iha tempu sarani sira funu hasoru Relijiaun sira seluk, funu na’in sira reza Tersu no sira fiar katak ho tersu ne’e sira bele defende-an. Nune’e sira manan duni funu. Tanba ne’e iha tinan 1571 Amo Papa Pio V foti loron ne’e nu’udar festa hodi fo hanoin fali mai ita kona ba kbiit Rozario nian hodi hasoru inimigu sira. Maibe mai ita hotu ne’ebe ohin selebra memoria ida ne’e, fo hanoin fali mai ita oinsa hamutuk ho Na’in feto kontra ita nia inimigu? Uluk sarani sira reza Tersu atu hafunu hasaru inimigu sira. Ohin hamutuk ho Na’in feto, ita reza Rosario hodi hafunu hasoru inimigu sira ne’ebe mai husi ita nia-an rasik.
Bainhira ita reza Tersu hamutuk ho Na’in Feto, ita halo meditasaun ida hodi kontempla Misterio ita Na’in Jezús Kristu nian rasik ne’ebe mak hahu husi Misterio Inkarnasaun to’o Misterio Paskua nian. Tan ne’e mak bainhira ita reza Tersu ita lee hela Evanjellu ka lee leitura ita Na’in Jezus kristu nia Moris. Loos duni katak bainhira ita reza Tersu, Tersu ne’e sai hanesan kilat ita nian. Iha fatin barak ema lori kilat ou katana hodi halo funu hasoru malu. Ita hanesan sarani, ita nia kilat ne’e mak Rozario. Bainhita ita reza tersu katak ita halo funu konta ita-nia rasik. Kontra ita nia-an mak oinsa? Ne’e katak kontra ita nia hahalok aat sira, kontra hasoru ita nia baruk-ten, nakar, tolok-ten no seluk tan. Tempu ohin loron labarik barak gosta tolok. Ne’e tanba sa? Ne’e tanba la reza Tersu, la reza Tersu halo diabu manan no ukun ita nia moris. Tanba ne’e mai ita reza husu Ita Na’in feto do Rozario hodi hafunu hasoru ita nia-an katak hasoru ita nia hahalok sira ne’ebe kontra Na’in Maromak nia Hakarak ka kontra Maromak Nia ukun fuan.
Liu husi mensajen ne’ebe padre hato’o tulun no fo hanoin fali atu fo valor ba Orasaun Rosario iha moris loron-loron nian. Ema hotu ne’ebe partesipa peregrinasaun ne’e sente haksolok tanba bele hala’o esperiensia fiar nian hamutuk ho di’ak.
(Miranda da Cruz)
