Radio Vaticana – Sidade poloneza Kostrzyn nian sei sai sede iha sábadu ne’e, loron 28 Jullu, ba Kongresu Internasionál Dahuluk kona-ba Evanjelizasaun Foun, iha ne’ebé sei partisipa, entre sira seluk, prezidente Pontifísiu Konsellu ba Promosaun Evanjelizasaun Foun, Mons. Rino Fisichella; prezidente Konferénsia Espikopál Poloneza, Mons. Jozef Michalik no arsebizpu Varsóvia nian, Kardeál Kazimierz Nycz.
Kuaze ema rihun ida atus rua husi membru asosiasaun oioin no movimentu sira ne’ebé servisu iha kampu evanjelizasaun nian sei partisipa iha enkontru ida-ne’e. Durante debate sira, sei halo avaliasaun kona-ba ámbitu oioin obra evanjelizasaun nian no kona-ba situasaun atuál Kreda Polónia nian, inklui husi pontudevista sosiolójiku.
Kongresu Kostrzyn sai eventu boot ida halo parte ba inisiativa lubuk ida atu haburas fiar. Iha sentidu ne’e, maka pergerinasaun sira iha tempu bailoron iha Europa husi grupu fiar-na’in sira nian ba Santuáriu marianu Czestochowa nian, sai sgnifikativu liu.
“Ho modu ne’e, ami hakarak, hatán ba João Paulo II nia apelu, ne’ebé konvida ita hotu atu partisipa iha obra evanjelizasaun foun nian”, dehan arsebispu Cracóvia nian, Kardeál Stanislaw Dziwisz, hodi fó sai peregrinasaun husi mahorik sidade Cracóvia nian ba santuáriu marianu famozu ida-ne’e.
“Liuhusi fiar, mane no feto sira husi otas oioin, ne’ebé sira nia naran hakerek ona iha livru vida nian, deklara katak furak liu tuir Na’i Jezús ne’ebé bolu ita atu fó sasin moris sarani nian.” (RL)
