RV – Iha loron 18 Novembru, Papa Francisco dedika katekeze ba Maromak nia mizerikórdia, basá ita besik daudaun ona Jubileu Estraordináriu.
Ilas ne’ebé Amu-Papa uza atu ko’alia kona-ba mizerikórdia mak Na’i nia odamatan, ne’ebé nafatin loke ho laran-luak atu simu ita-nia arrependimentu.
Odamatan nakloke
Husi Sínodu Bispu sira nian, Amu-Papa fó hanoin, família sira hotu simu enkorajamentu boot atu hamriik iha odamatan nakloke ne’e nia entrada.
“Se odamatan Maromak nia mizerikórdia nakloke nafatin, ita-nia kreda sira nia odamtan, ita-nia parókia no dioseze sira-nian tenke loke nafatin. Nune’e ita hotu bele sai no lori Maromak nia mizerikórdia ida-ne’e. Jubileu signifika odamatan boot Maromak nia mizerikórdia, maibé mós odamatan ki’ik sira ita-nia kreda sira ne’ebé nakloke atu husik Na’i tama eh dalabarak husik Na’i sai husi ita-nia estrutura sira, husi ita-nia egoízmu”.
Odamatan taka metin
Amu-Papa temi fatin ruma iha mundu ne’ebé nunka aka odamatan ho xave, maibé mós barak seluk ne’ebé normál tiha ona atu iha odamatan taka metin. “Maski komprensivel, nia sai sinál aat ida!”, Papa Francisco afirma. Ita labele husik atu ideia ida-ne’e aplika iha sistema moris família nian, sidade nian, sosiedade nian no, menus liután, ba Kreda nia moris.
“Kreda ida lahó ospitalidade, nune’e mós família ida taka metin iha an raik, mortifika Evanjellu no dezertifika mundu. La iha odamatan taka metin iha Kreda! Buat hotu nakloke!”
Papa Francisco kontinua hodi afirma katak odamatan tenke proteje, maibé la hewai. Labele obriga odamatan; maibé husu lisensa atu bele halo ospitalidade nabilan. Maski nune’e, ema barak lakon tiha ona korajen inklui atu dere odamatan.
“Ema hirak mak lakon konfiansa, la iha korajen atu dere odamatan ita-nia fuan sarani nian, ita-nia kreda sira nia odamatan. Ita hasai tiha konfiansa. Halo favór, atu ida-ne’e keta akontese”.
Jezús mak Odamatan
Jezús, Amu-Papa esplika, mak odamatan ne’ebé halo ita tama no sai. “Basá bibi-luhan Maromak nian la’ós kadeia ida, maibé refújiu ida”. Maibé iha odamatan, iha mahein, ne’ebé rona Jezús nia lian, nune’e loke odamatan no halo tama bibi sira ne’ebé Nia lori.
“La’ós mahein mak hili bibi sira, maibé Bibi-Atan di’ak. La’ós sekretáriu eh sekretária parókia nian mak deside sé bele tama. Kreda mak porteira Na’i nia uma nian, la’ós patroa (na’in)”, Papa Francisco fó hanoin. Nune’e mak iha mundu tomak ema tenke haree Kreda: nu’udar mahein ba Maromak ne’ebé dere odamatan, nu’udar resesionista Maromak nian ne’ebé la taka odamatan ho deskulpa katak ita la’ós ema uma nian.
Papa Francisco taka ho pedidu ida:
“Atu família sarani sira halo iha ninia uma nia odamatan oin sinál ki’ik ida ba Odamatan boot mizerikórdia no akollimentu Maromak nian. Ho espíritu ida-ne’e, ita besik daudaun ba Jubileu. Sei iha Odamatan Santa, maibé odamatan Maromak nia mizerikórdia nian. No atu iha mós ita-nia fuan nia odamatan atu simu Maromak nia perdaun eh fó ita-nia perdaun no akolle ema hotu ne’ebé dere ita-nia odamatan”.
Loron Infánsia nian
Hotu tiha katekeze, Amu-Papa fó hanoin kona-ba loron Mundiál Direitu Infánsia nian, selebra iha 20 Novembru.
“Devér ida atu proteje labarik sira no tau uluk sira nia di’ak ba kritériu seluk, atu halo sira terus tan forma eskravidaun no tratamentu aat sira. Ha’u halo votus atu komunidade internasionál matan moris kona-ba kondisaun moris menór sira nian, liuliu iha ne’ebé labarik sira hetan rekrutamentu husi grupu armadu sira; nune’e mós bele tulun família sira atu garante ba labarik mane no feto ida-idak direitu ba eskola no edukasaun”.
