CIAO ONLINE – Preparasaun ba Kapítulu Jerál XXIV, ne’ebé sei halo iha Roma, maski la hatene bainhira tan pandemia, hala’o online ba nivel CIAO husi loron 23-26 Janeiru 2021, ho prezensa Ir Maria Assunta Inoue nu’udar Konselleira Jerál referente CIAO nian; iha prezensa Ir Chiara nu’udar Reguladora Kapítulu Jerál nian ne’ebé fó input kona-ba sinodalidade hodi refere ba reflesaun ida Ir Eliane Petri nian; Ir Paola Battagliola, Konselleira Vizitadora ne’ebé ko’alia kona-ba “A te le affido” nu’udar resposta ba dezafiu ohin hodi refere ba reflesaun ida Ir Piera Cavaglià nian.
Durante tempu ne’e, Inspetora no delegada sira haree kona-ba resposta sira ba núkleu tolu husi Inspetoria nivel CIAO nian: komunidade vokasionál, komunidade sinodál no komunidade profétika-misionária.
Loron ikus ami iha enkontru ho Madre Yvonne, Superiora Jerál ne’ebé ami hotu haksolok bele rona diretamente husi nia, tanba ho inserteza ohin, pergunta boot mak bainhira loos bele halo Kapítulu Jerál, nune’e mós agradese nia ba ninia animasaun no gia, liuliu iha tempu ikus difisil ne’e.
Madre Yvonne hatudu otimizmu no esperansa boot. Iha ninia lia-menon sira nia afirma pontu sira tuirmai ne’e:
- Tempu ida-ne’e la’ós fasil atu mooris, maibé tempu ida entuziazmu no interesante, tanba, bainhita iha dezafiu sira ita hetan impulsu atu ba babukak, ba orasaun, ba dixernimentu ba kriatividade. Iha momentu difisil hotu istória Institutu nian, karizma sempre sai nu’udar forsa kriativa.
- Madre Yvonne foti nu’udar modelu Papa Francisco ne’ebé la hein atu krize remata, maibé nia impulsiona daudaun Kreda atu buka dalan foun sira (ekonomia, Paktu globál-edukativu, tinan Laudato Si’ nian…), nune’e mós Don Bosco, ne’ebé la hein mudansa sosiál atu atua. Amu-Papa dehan katak husi krize ida ema la sai hanesan uluk: di’ak liu eh aat liu. La’ós krize mak muda ita, maibé depende oinsá ita moris krize ne’e, oinsá ita husik nia interpela ita, moris no rekoñese Maromak nia bolun sira iha momentu istória nian ida-ne’e.
- Iha pandemia ida-ne’e ita simu konvite atu reflete kona-ba esensiál, atu reforsa fraternidade entre itam ho foin-sa’e siram ho leigu sira ne’ebé partilla misaun, tanba fraernidade no solidariedade mak sinál esperansa nian.
- Nia konvida FMA sira atu hetan oan-feto foun sira no fó ba foin-sa’e feto sira hakaran atu hamutuk ho ita, hanesan ita, katak sira bele fó kontributu ho sira-nia moris ba foin-sa’e sira.
- Hodi halimar nia fó hanoin katak, nia sempre insiste ita atu prepara an ba komunikasaun, maibé, presiza virus ida ne’ebé obriga ita hotu atu tama iha komunikasaun oiline.
Ir Assunta fó liafuan ikus molok taka enkontru online hodi parabeniza tanba serbisu ho di’ak. Nia fó hanoin hikas Madre Yvonne nia liafuan ne’ebé ezorta CIAO atu sai “naroman iha Ázia no iha mundu nia fuan”. Nia Refere fali ba Madre nia lia-fuan nia dehan katak nia impresionada ho oinsá Papa Francisco la hein pandemia remata no nune’e mós Don Bosco halo. Tan ne’e, nia konvida atu atua, atu fó ba foin-sa’e sira mehi ida ba futuru, atu enkoraja sira ba esperansa. Nia fó hanoin Evanjellu loron nian, iha-ne’ebé Jezús dehan katak “to’os boot, maibé serbisu-na’in kuran”, nune’e Ir Assunta husu: “Ita bá iha-ne’ebé no ita bá ho sé atu halibur to’os nia fuan?”.
