Cassa 4-7 Abril 2022, estudante sira husi pre-secundaria no secundaria halo retiru hodi prepara an ba festa pascoa ho tema ”ita la bele kole atu halo diak; tan, iha nia tempu ita sei sohi sei kuu, se ita la para. Tan ne’e mak sei iha tempu, buka halo diak ba ema hotu” {Gal 6, 9-10}
Iha loron Segunda-feira, 4 fulan Abril retiru hahu ho estudante 7 ano sira, hamutuk 104. Ir. Sebastiana mak fo retiru, hato’o ba sira kona ba signifikado retiru nian, liafuan retiru katak retirare ka hadok an oituan husi, atividade lor-loron nian, barulho, sasan no ema. Retiru mak momento silensio nian atu ita rona ita nia an rasik, no rona Maromak nia Futar Lia. Hanesan amu papa Francisco nia mensagen ba Quaresma 2022, fo hanoin mai ita katak Quaresma mak tempu furak, tempu rasik atu halo renovasun pessoal no komunitaria (iha familia, iha classe, iha escola no iha komunidade sarani Cassa). Irman prepara mos, selebrasaun penetencial nian, atu tulun estudante sira hakbesik-an ba Sakramento rekonsiliasaun.
Ohin mak loron grasa nian, ba estudante sira, tanba iha tinan ida ne’e deit mak iha amululik mai rona konfesa, atu bele prepara an didiak ba festa bo’ot Pascoa. Padre Eugenio Redentor (vigario Paroco) disponivel mai rona konfisaun. Padre kontente tanba hasoru estudante barak ne’ebe hakarak hakbesik an ba Sakramento Rekonsiliasaun/Konfesa. Molok rona Konfesaun Padre halo katekeze badak, hodi explika oinsa halo konfesa didiak. Ne’e momento importanate liu ba estudante sira hotu ne’ebe halo ona primeira komuñaun (SD, SMP no SMA). Tanba kleur ona, sira la halo esperiensia atu hakbesik an ba sakramentu Rekonsiliasaun. Hafoin remata ho selebrasaun Eukaristia, iha lokraik.
Iha loron daruak retiru nian, iha Tersa-feira, 5 fulan Abril, ba alunus 8 ano sira, hamutuk 105. Ir. Armenia mak fo reflesaun, irman hato’o ba sira katak amu papa konvida ita hotu, la kole atu halo buat diak iha ita nia moris, iha eskola, iha uma no iha fatin hotu ne’ebe ita ba. No mos ho aiknanok evangello nian ‘’oan ne’ebe soe hela uma’’. Fo hanoin fali Maromak nia laran sadia no nia domin bo’ot ba ita, wainhira ita fila fali, Nia fo fali ba ita, ita nia dignidade nu’udar oan tau fali Kadeli ba ita nia liman, sapato no unuk furak. Maromak nia domin bo’ot liu fali ita nia sala, iha momento ne’ebe susar hanoin hetan katak Maromak hein nafatin ita, halai hasoru ita, hakoak ita. Ne’e mak grasa ne’ebe fo ba ita koragen atu ita fila fali ba ita nia Aman doben. Depois de reflesaun, estudante ida-idak halo sileneiu ba momento ruma, hodi hatan fali ba Maromak nia domin, hodi hakerek sira nia esperensia rasik ne’ebe sira simu husi Maromak kona ba domin no laran diak, liu husi sira nia familia, no ema hotu ne’ebe sira hasoru.
Quarta feira, 6 Abril mak loron datoluk retiru ba estudante 9 ano sira, hamutuk 103. Tema retiru hanesan, foti husi amu Papa nia mensagen ba tempu Quaresma, ir. Sebastiana konvida estudante sira atu reflete kona ba “ita la bele kole halo diak…buka halo diak ba ema hotu”. Hahu halo diak iha familia laran, iha eskola, iha fatin hotu ne’ebe ita ba. Tanba tempu Quaresma mak tempu furak atu halo renovasaun pessoal, husik ita nia an ba Maromak nia laran sadia atu nune’e ita bele tama iha festa bo’ot Pascoa ho fuan mós. Iha momento reflesaun estudante ida-idak hakerek sira nia proposito atu moris nu’udar foinsa’e sarani ne’ebe hatene prepara an didiak atu selebra festa pascoa ho ksolok.
Quinta feira, 7 Abril loron dahaat retiru ba estudante SMA publíco Cassa. Estudante sira hamutuk 63 ne’ebe partisipa iha retiru, akompaña husi sira nia professores sira. Iha retiru ir. Sebastiana no ir. Armenia mak fahe reflesaun, no inserta mos mini Taize. Ne’e mak esperensia dahuluk ba foinsa’e sira ne’e, ba sira buat foun ida. Momente ne’ebe halo sira hotu hakmatek atu rona hodi partisipa ho diak. Iha momento reflesaun pessoal, sira ida-idak halo sira nia proposito, atu bele moris tuir. Hafoin ida-idak halakan sira nia lilin iha Altar oin nu’udar sinal sira hakarak lao tuir dalan naroman ba festa Pascoa.
Retiru remata, hodi entrega ba Nai Feto Nia Liman, estudante hotu nia hakarak diak atu sai ema foun iha tempu pasqua nian, ho orasaun Angelos.
Ir. Teresa de Carvalho
