Dili – Tempu Kuarezma mak tempu preparasaun ba festa boot liu, festa Páskua.Nune’e mak Pe. João Roque, pároku Maria Auxiliadora nian, organiza Irmán sira husi Kongregasaun FMA, SSPS, Ursulina, nst, hamutuk ho leigu balun hahú halo retiru no fahe reflesaun ba sarani sira iha parókia,kapela no sentru sira. Retiru sei hala’o husi loron 28 Marsu to’o 4 Abríl, ho tema tuir Dioseze Dili nian: “Eukaristia ho Ekolojia”. Partisipante ba retiru ohin, 28 Marsu 2022 mak Inan-Aman no mós Joven sira hamutuk. Retiru iha kapela Nossa Senhora da Graça hamutuk ema besik na’in 500.
Molok atu tama ba reflesaun, Irmán sira prepara materiál sira hanesan: Rai, Bee, Ai-hun, ahi reprezenta natureza sira hodi lori ba altár oin simbolikamente.
Reflesaun ba retiru ne’e liga Eukaristia ho Ekolojia mak ita ema nia relasaun ho Maromak ho maun alin sira liu husi natureza. Tempu kuarezma nian mak nu’udar tempu hakribiit sala nian, tempu konversaun, renovasaun no tempu ba resurreisaun ka moris foun nian.
Liga mós ho Amu-Papa Francisco nia mensajen ba Kuarezma tinan ne’e nian katak “Keta kole atu halo di’ak” (Gal, 6:9), nune’e sarani sira simu konvite atu keta kole halo karidade, keta kole harohan, keta kole hasai husi an rasik hahalok aat sira. Nu’udar sarani, buka nafatin halo di’ak ba ema seluk ho atitude di’ak hodi konfia iha Na’i ne’ebé laran-sadia no perdua-na’in.
Ikus nian mak halo ezame konxiénsia nian ho Maromak nia ukun-fuan sanulu (10) ne’ebé liga ho ema nia salan hasoru Maromak, maluk sira no mós sala hasoru natureza.
(Ines Bartolo FMA)
