Dili – Iha loron 24 Janeiro mak loron ksolok no nakonu ho grasa ba Instituto FMA, liu-liu FMA Ispetoria TIN. Tamba iha foin sa’e nain tolu; Ir. Adelaide G. Almeida, Ir. Adelia Amaral no Ir. Agustinha Lopes ne’ebe ho ksolok no aten brani hatan ba Maromak Nia bolu hodi servi labarik no foin sa’e sira iha Kongregasaun FMA. Selebrasaun furak ne’e halao iha Kapela Komunidade São José-Novisiado Komoro-Dili.
Maromak Nia bolun mak nafatin especial no úniku ba ema ida-idak iha tempo no espasu hotu. Tan ne’e maski mundo oferese buat barak ba ema atu haksolok, maibe sei iha ema balu ne’ebe hakarak buka ksolok rohan laek nian. Sira hatene katak ksolok los ne’e bele hetan iha Maromak deit. Tan ne’e mak iha tempo ohin nian ne’ebe nakonu ho oportunidade atu hetan naran bo’ot no moris diak la teri netik Irmán nain tolu nia dalan atu tuir Jesus Kristu ne’ebe saran Nia moris atu mundo hetan Salvasaun. Tamba sira hatene katak ksolok sira hotu mundo nian mak provizorio deit.
Iha Pe. Trans nia Omilia, Padre dehan: “Uluk nanain Agradese Maromak tan Nia domin ne’ebe bo’ot tebes ba ema nune’e kontinua bolu foin sa’e sira, agradese ba familia ne’ebe ofetese sira nia oan no agradese ba Irmán nain tolu ne’ebe hatan ba bolun ne’e. Kongregasaun presiza nafatin membru foun atu kontinua ba oin. Se laiha foin sa’e sira ne’ebe hakarak tuir dalan vokasaun iha kongregasaun mak kongregasaun ne’e sei mate. Iha kingregasaun ka Instituto ida nia laran mos husu ba membru sira atu dezenvolve-an hodi sai aset ne’ebe diak ba kongregasaun no bele fo fuan. Ba Irmán nain tolu, moris ne’e laos fasil deit maibe laos mos katak laiha solusaun, basá Ida ne’ebe bolu sei tau matan no tulun imi.”
Obrigada wain ba Irmán nain tolu ba imi nia disponobilidade atu hatan ba Maromak nia konvite, Obrigada mos ba Familia ne’ebe ho laran luak oferese ona imi nia oan no ba formadora sira hotu ne’ebe tulun no prepara ona sira atu ba haklaken Maromak nia domin ba ema hotu liu-liu labarik no foin sa’e sira. Parabens e boa misaun.
(Noemia de Deus FMA)
