Dili – Husi loron 11 kalan to’o loron 15 FMA, joven no leigu sira tuur atu hanoin hamutuk programa tinan lima nian, nune’e bele la’o hamutuk atu realiza nia. Depoizde halo planu tinan lima nian husi loron 12-14 Novembru, iha sábadu 14 loraik to’o 15 meiudia, partisipante sira ba programasaun hanoin kona-ba planu 2016 nian. Se iha tinan lima nia planu iha de’it leigu no joven na’in 7, ba planu 2016 prezente leigu no joven na’in 18.
Tuir Kapítulu Jerál 23 ita-nia OBJETIVU JERÁL mak “Moris konversaun pastorál ho forsa profétika: sai ho foin-sa’e sira komunidade ne’ebé bá li’ur, ne’ebé fó sasin no haklaken Jezús ho esperansa no ksolok”. Atu halo ida-ne’e ESTRATÉJIA ita hili mak “Enkontru ne’ebé forma no transforma” liuhusi PROSESU, katak “Formasaun kontínua ba enkontru no iha enkontru nu’udar esperiénsia ne’ebé transforma no hahoris vida”. Atu to’o ba objetivu boot, ita iha HILIN 3: “Nakfilak an liuhusi enkontru, hamutuk ho foin-sa’e sira, misionária esperansa no ksolok nian”.
Maibé, molok programasaun, Ir Jacinta Gusmão aprezenta “Planu Pastorál 2016” Dioseze Baucau ho lema “Sentido de pertença” no “Tinan Mizerikórdia nian”. Aleinde ne’e, Ir Alma Castagna aprezenta “Estreia 2016” Reitór-Mor Salezianu nian ba Família Saleziana ho lema “Ho JEZÚS, ita hala’o hamutuk aventura Espíritu nian!”. Input rua ne’e atu Provínsia FMA TIN bele integra iha planu ida-ne’e buat ne’ebé Kreda no Kongregasaun husu iha tinan 2016.
Grupu FMA haat, grupu foin-sa’e ida no grupu leigu adultu ida, konsege elabora asaun konkreta sira atu implementa iha nivel lokál hanesan tuirmai ne’e:
Nakfilak an liu husi enkontru
Liña asaun
Hakle’an no fahe Maromak Nia Liafuan iha komunidade edukativa, família no grupu ekleziál sira, atu tulun lee realidade ho matan Maromak nian no deskobre buat ne’ebé Nia hakarak.
Modalidade-asaun konkreta
- Formasaun Bíblika: hatoman an atu lee no komprende Sagrada Eskritura hamutuk iha família laran, komunidade edukativa, Família Saleziana no tempu hanesan halo sharing.
- Organiza hamutuk ho estrutura parókia no membru Família Saleziana atu realiza retiru regulár ba foin-sa’e iha tempu forte no Festa Saleziana sira ho tema: Mizerikórdia ho estilu salezianu.
- Hili pasajen Bíblika ne’ebé Amu-Papa Francisco indika iha Bula “Misericordiae vultus” nu’udar materiál ba retiru mensál FMA no formande sira-nian; nu’udar materiál Lectio Divina nian ba família; nu’udar materiál ba katekeze (labarik, foin-sa’e no família).
Hamutuk, ho foin-sa’e sira
Liña asaun
Haree hamutuk ho família sira rasik sira nia realidade ohin nian no pastorál famíliar ida ne’ebé iha sintonia ho orientasaun Kreda nian no akompaña família sira iha sira nia knaar edukativu.
Modalidade-asaun konkreta
- Vizita família sira, atu rona sira nia problema, no tulun sira iha sira nia knaar edukasaun no halo obra mizerikórdia nian.
- Hakle’an tópiku kongresu família nian iha Viqueque no disponivel atu serbisu hamutuk ho Parókia bainhira dokumentu sínodu iha ona.
- Serbisu hamutuk Família Saleziana, ho institusaun no organizasaun seluk atu bá hasoru labarik no foin-sa’e sira ne’ebé moris iha perigu laran no identifika família sira nia preokupasaun.
Misionária esperansa no ksolok nian
Liña asaun
Nu’udar komunidade edukativa no relijioza konkretiza konversaun ekolójika iha proposta edukativa-pastorál atu tau matan ba ema, ambiente no ba bem komún.
Modalidade-asaun konkreta
- Halo leitura no hakle’an dokumentu “Laudato Sì” ho grupu oin-oin.
- Sensibiliza, sosializa no motiva kona-ba respeitu an rasik, hadomi ambiente no bem komún ba irmán sira, família, foin-sa’e no labarik iha área edukasaun formál no informál liuhusi formasaun sívika iha ambiente ne’ebé ita hela bá (halo poster, kuda aihun, Limpeza, workshop ka camping).
- Hanorin labarik no foin-sa’e sira atu halo resiklajen (lixu orgániku metál no papél sira).
Iha konkluzaun serbisu sira ho leigu no foin-sa’e sira, Ir Alma Castagna, nu’udar provinsiál, husu atu Komunidade ida-idak hanoin atu halo iha lokál buat ne’ebé ita planu ona. Nia mós fó hanoin katak, “serbisu sei kontinua ho Ámbitu sira (Administrasaun, Formasaun, Pastorál Juveníl, Família Saleziana, Komunikasaun Sosiál, Misaun). Sira tenke halo programa tinan lima no karik sei tau tan buat ruma ne’ebé ita la ko’alia iha-ne’e, tanba ba FMA sira husi Sentru Institutu nian husu buat seluk tan espesiál ba sira nu’udar konsagrada”.
