Dili – Husi loron 16 to’o loron 18, Provínsia Tin hala’o asembleia ba avaliasaun tinan 2012 nian no programa tinan pastorál foun 2013 nian.
Entre partisipante sira mai FMA 45 no leigu na’in 9.Loron dahuluk iha parte dadeer hahú ho grupu ki’ik atu haree uluk avaliasaun mai husi komunidade sira hodi identifika strengths, weaknesses, opportunities, threats (SWOT analysis).
Grupu sira identifika katak ita-nia komunidade nia kbiit mai husi kriasaun mentalidade evanjelizasaun foun no komunkasaun fiar, interese atu hakle’an moris espirituál, autoformasaun, prezensa leigu no sira-nia kolaborasaun nune’e mós laran-manas no dedikasaun iha ita-nia misaun. Buat ne’ebé sai nu’udar fakeza mak falta organizasaun tempu nian, la tau prioridade, la iha kolaborasaun entre membru sira komunidade no kuran haka’as an atu aproveita materiál sira inspetoria oferese.
Husi ne’e husi kedas loraik loron hanesan, iha grupu ki’ik ba haree dalan sira ne’ebé presiza halo iha tinan ida-ne’e :
1 Haburas mentalidade evanjélika hodi hakle’an no valoriza vida sakramentál liuliu Eukaristia no Rekonsiliasaun, ne’ebé lori ita atu nakfilak an ba domin;
2 Halo rekonsiliasaun hodi kontinua purifika ita-nia motivasaun, liafuan eh hahalok, hodi moris iha prudénsia no delikadeza iha relasaun sira;
3 Fó atensaun partikular ba família sira atu sai konxiente kona-ba sira-nia knaar edukativu, ekleziál no sosiál.
Iha loron 17, grupu sira identifika estratéjia sira atu implementa dalan tolu ne’ebé hili ba tinan 2013. Bele dehan katak dalan sira lori hotu atu FMA, família, leigu, foin-sa’e no labarik sira, hametin relasaun ho Maromak ho kbiit atu fó razaun esperansa ne’ebé ita iha no atua evanjelizasaun foun, “foun iha ninia ardór, ninia métodu, ninia espresaun sira” atu haklaken fiar ne’e ba maun-alin sira iha misaun entrega ba ita ida-idak. Asembleia remata tuku 4 no sira ne’ebé la hola parte ekipa iha ámbitu sira fila ba sira-nia fatin. Membru sira ámbitu nian fali organiza an hodi ba Tasi-Tolu iha monumentu João Paulo II ba momentu marianu no reflesaun kona-ba “koordenasaun ba komuñaun”.
Loron 18 dedika ba ámbitu sira atu haree fali proposta sira no konkretiza liután ninia realizasaun hodi haree modalidade sira iha ótika kolaborasaun entre ámbitu sira.
