Dili – Programasaun anuál Inspetoria FMA TIN (Timor-Indonesia) hahú husi 25-27 Novembru 2022, partisipa husi FMA sira husi uma 13 no reprezentante sira husi Komunidade Edukativa sira. Programasaun ne’e atu define objetivu, modalidade sira atu to’o ba objetivu no asaun konkreta sira, aleinde tempu no responsavel sira ba tinan pastorál 2023.
Iha tempu ne’ebé Kreda hakle’an ninia identidade sinodál, Inspetora FMA, Ir Alma Castagna, husu atu ita moris mós espíritu sinodalidade ne’e, hodi “hametin komuñaun iha Inspetoria no iha komunidade ida-idak”. Uluk kedas ita hakarak asume profesia komuñaun nian, ne’e duni hodi halo ain-hakat ida-idak ita bele to’o ba mehi ida-ne’e.
Iha etapa kontinentál sínodu nian, no iha dokumentu hateten: “rona mak perspetiva komuñaun nian ho maun no biin alin sira no ho Aman Maromak, tanba ita-nia Maromak mak Maromak ne’ebé rona”. Ne’e duni, Ir Alma husu atu iha programasaun ne’e presiza rona malu, atu bele mai ho hanoin no asaun sira atu “hatán ba ema kiak no rai nia halerik” (LS).
Programasaun hahú ho “Lectio Divina” kona-ba pasajen “ai-knanoik fermentu nian” (Lc 13:20-21), ne’ebé Reitór-Mór tau nu’udar tema Estréia 2023 nian.
Loron daruak programasaun nian hahú ho Santa Missa, selebra husi Pe. Plácido SDB, ne’ebé iha ninia komentáriu ba Evanjellu loron nian, iha-ne’ebé Jezús dehan katak ohin ita moris iha tempu konfuzaun no presiza moris iha “vijilánsia”. Iha tempu vijilánsia ida-ne’e presiza iha vida morál ireprensivel no rona Maromak nia Liafuan iha orasaun. Atividade hotu ne’ebé sei programa tenke esprime Maromak nia Liafuan eh Maromak nia vontade no hahú husi orasaun, basá nune’e de’it mak ita bele dehan ida-n’e “atividade pastorál” ida. Ita bele mós aprende husi vida monástika prinsípiu “ora et labora”.
Depoizde Santa Missa, loron ne’e mak loron atu identifika modalidade sira tuir buat ne’ebé elabora ona husi programasaun tinan neen nian iha fulan Abríl 2022, no hafoin haree oinsá ámbitu sira bele kolabora ho estilu sinodál.
Loron datoluk monu iha Domingu I Adventu nian. Padre Silvano SDB mak selebra Santa Missa. Komenta Evanjellu, nia husu atu ita neon-na’in. Basá se ita la neon-na’in ita la haree Maromak ne’ebé liu, ita la rona Maromak nia mensajen. Vaticano II husu ita atu hatene lee sinál sira tempu nian. Pe. Silvano husu atu Irmán sira hanoin tok kona-ba “foin-sa’e sira ne’ebé la besik Igreja… Sira mak sala ka, ita mak sala ka, laiha ema ne’ebé sala maibé tempu mak sala?” Ita presiza buka hatene Maromak nia hakarak ne’ebé “ko’alia mai ita liuhusi nia Liafuan” maibé mós “liuhusi eventu sira, liuhusi lala’ok natureza nian” Karik “Maromak hakarak ita moris iha paz”, “halakon kilat”, atu ita moris nu’udar maun no alin.
Durante programasaun anuál iha mós momentu marianu, iha-ne’ebé partisipante halo peregrinasaun ba gruta Na’i-Feto nain iha Gólgota (Comoro) hodi husu atu aprende husi Nia sai prezensa ne’ebé fó moris iha kontemporaneidade.
Iha lia maktakak, Provinsiál dehan katak programa hamutuk mak “pasu primeiru de’it”. Avaliasaun loos mak ita-nia hahalok atu implementa programasaun, “oinsá ita haklaken Evanjellu, oinsá ita haklaken Maromak nia domin ba ema ne’ebé hasoru ita”.
(JG)
