Venilale – Iha 29 Dezembru 2017 komunidade Edukativa Maria Auxiliadora, Irmán nain 6 no aspirante ida ho kolaborador mestre, katekista sira no ho foin-sa’e 
sira nain 6, halo programasaun komunitaria ba tinan 2018 nian. Iha primeira pasu hahu ho orasaun ne’ebé diriji husi Madre Cecilia atu loke programasaun, no iha orasaun nia laran ami hasaé simbolu ne’ebe nu’udar gia no haroman ami nia dalan misaun nian, simbolu hirak neé mak : Biblia, Lilin, no ai-horis. No depois de orasaun Madre mos leé mai ami Madre provinsial, Me. Alma ‘’ nia surat neébe fo roman no enkoraja ami iha aktividade ida neé. Iha segunda parte Me. Cecilia esplika hodi klarifika liutan ba partesipantes komunidade edukativa nia komponente sira katak : madre sira, joven sira, no inan aman, no kolaborador leigu sira, liu-liu nia finalidade atu “asegura konverjensia no kontinuidade intervensaun edukativa sira nian atu realiza projetu uniku”. Ida ne’e mak rasaun tanba hamutuk halo projetu komunitariu ba tinan foun. No depois ida neé ami tama kedas ba liña asaun no modalidade sira ba hilin tolu:
- Nakfilak-an liuhusi enkontru
- Hamutuk ho foin saé sira
- Misionaria/o ksolok no esperansa nian
Ami nia enkontru la’o di’ak no furak liu tanba hetan partisipasun maksimu husi partesipantes sira ne’ebe fo sira nia sujestaun atu bele tulun labarik no foin saé no dada sira atu bele besik liutan ba Maromak liu husi aktividade sira ne’ebé programa ba tinan tomak. Remata ho orasaun “Ami Aman” , ami agradese Maromak ba nia gia no entrega buat hotu ne’ebé ami sei halao atu fo gloria deit ba Nia. Ami mos entrega ami nia an ba Nain Feto, Inan no Ausiliadora ne’ebe prontu atu akompaña ami atu sai fiel ba karisma Don Bosco no Madre Mazzarello wainhira realiza ami nia projetu komunitariu ida ne’e.
(Domingas)
