Dili –Vizaun boot ne’ebé Kapítulu Jerál 23 entrega ba FMA ba tinan neen mai ne’e mak “Haluan hateken: ho foin-sa’e sira, misionária esperansa no ksolok nian”. No orizonte ne’ebé motiva ita-nia hilin no ain-hakat konkretu sira renovasaun nian mak “konversaun pastorál” hanesan Papa Francisco iha Evangelli gaudium husu husi ajente pastorál no sarani hotu.
Konversaun pastorál ne’e mak sai tema formasaun nian ba diretora sira komunidade nian iha Inspetoria TIN. Ir Alma Castagna, inspetora, depoizde aprezenta aspetu sira konversaun nian lori irmán sira atu reflete kona-ba dezafiu boot liu ne’ebé sira hasoru iha komunidade sira.
Atu ko’alia kona-ba “konversaun pastorál”, uluknanai presiza dehan katak ne’e mak konversaun auténtika, pesoál nu’udar modu ida filafali ba Maromak, Maromak ne’ebé hatudu nia Oin iha Jezús Kristu. Ne’e katak, tau Maromak iha sentru, iha enkontru pesoál ho Maromak ne’ebé muda ita-nia moris, sai husi “autoreferensialidade” no “konxiénsia izolada” atu nune’e bele lori ita mós ba “konversaun fraterna no komunitária” ba “saida misionária”.
Nune’e, konversaun fraterna no komunitária presupoin libertasaun husi an rasik nia kondisionamentu sira hanesan mentalidade metin iha hanoin rasik, limite psikolójiku sira, lisan no tradisaun sira…atu husik vida grasa nian dezenvolve potensiál fraternidade no komuñaun nian, basá konversaun ba Jezús lori ba konversaun ba maluk sira. Ida-ne’e implika empeñu ida ba di’ak sosiál komún. Basá “anúnsiu Evanjellu nian, katak karidade, iha risku atu ema la komprende no hamout nia iha tasi liafuan sira nian iha-ne’ebé sosiedade atuál komunikasaun nian submete ita loroloron. Karidade manifesta liuhusi obra sira konfirma karidade ho liafuan de’it”.
Ita bele ko’alia mós kona-ba “konversaun sosiál” hodi foti konxiénsia profunda no klara kona-ba ezijénsia sosiál sira Evanjellu nian. Buat ne’ebé karakteriza konversaun “sosiál” ne’e no distinge husi “konversaun fraterna” mak empeñu komunitáriu atu muda situasaun injusta sira.
Konversaun pesoál no komunitária lori ita ba konversaun pastorál no misionária, sai husi autoreferensialidade hodi sai autotranxendente, hodi “sai” ba misaun katak evanjelizasaun, to’o ba periferia sira ne’ebé presiza rona Evanjellu ksolok nian.
Mai ita FMA sira Jezús Bibi Atan Di’ak mak ita-nia modelu karizmátiku. Nune’e ita tenke konfigura ita-nia an ho Bibi-Atan Di’ak ne’e. Hateke nafatin ba Jezús Bibi-Atan Di’ak, ita ba buka la’ós de’it bibi ne’ebé lakon, maibé mós bibi ne’ebé iha ita-nia komunidade sira ho akompañamentu pesoál no adekuadu .
Dezafiu sira ohin nian, hanesan dezafiu ne’ebé Amu-bispu Basílio do Nascimento husik ba Família Saleziana iha loron konkluzaun tinan bisentenáriu Don Bosco nia moris nian (29 Agostu), husu ita atu la serbisu mesak, atu serbisu iha rede, ho Família Saleziana, ho Kongregasaun sira, ho Dioseze no Kreda lokál.
