Dili – Iha fulan Setembru ita selebra Fulan Bíblia. Kreda konvida ita atu hatene kle’an liután Maromak nia Liafuan, no hadomi ba beibeik no halo loroloron, meditasaun Liafuan nian no harohan ho Liafuan ne’e. S.Jerónimo ne’ebé ita selebra nia festa iha loron 30 Setembru, biblista boot hateten: “La hatene Eskritura katak la hatene Jezús Kristu”.
Nu’udar manorin dixiplina “relijiaun” nian, ami hakarak kuda iha labarik sira domin ba Maromak nia Liafuan. Modu ida mak hodi halo kompetisaun kuiz Bíblia nian.
Ohin, 24 Setembru, loron ne’ebé labarik husi “terceiro ano” sira halo sira-nia konkursu kona-ba koñese Maromak nia Liafuan.
Molok kompetisaun, estudante sira ho profesór/a sira halo orasaun entronizasaun Bíblia nian.
Quiz hahú ho kompetisaun ba turma ida-idak atu hetan manán-na’in. Manán-na’in husi turma ida-idak mak kompete malu fali entre turma sira: A, B, C. Primeiru lugar manán-na’in husi Turma B, segundu lugár husi Turma C no terseiru lugár husi turma A.
Sira ne’ebé manán simu prémiu “Novo Testamento” iha lia-tetun. Ita hein labarik sira bele haboot sira-nia hakarak atu lee no tuirmai hadomi ba Maromak nia Liafuan.
(JG)
