Baucau – Selebrasaun festa Páskua iha tinan ida ne’e, loron 27 Marsu, sai úniku ba ami komunidade Baucau tanba selebra hamutuk ho Labarik sira husi oratóriu Diwake, Teulale no grupu OPIAM, hodi halo atividades kona-ba hadomi, hamoos no haburas ambiénte nu’udar preparasaun ba festa Me. Jerál nian.
Atividade hahú ho kumprimenta malu hodi hato’o boas festa Páskua nian; hafoin Ir. Jacinta Gusmão esplika ba labarik sira kona-ba Amu-Papa nia ensíklika kona-ba Laudato Si. Nia halo sínteei kona-ba Laudato Si katak nu’udar umanu maske kiik ka boot ita hotu iha responsabilidade atu kuidadu no tau-matan ba ambiente nu’udar ita hotu nia uma. Atu kuidadu ambiénte sai moos no furak presiza ida-idak nia kolaborasaun hodi hola konxiénsia atu la soe foer arbiru no estraga ai-horis sira, maibé tenke iha sensibilidade atu hamoos no haburas ambiénte ne’ebé ita hela bá.
Depoizde formasaun badak kontinua ho jogu ne’ebé dirije diretamente husi Ir. Jacinta Gusmão. Iha jogu ida ne’e liurai-feto presiza atu labarik sira halo limpeza hodi hili foer sira no tau hamutuk iha lixu fatin; segundu liurai-feto presiza atu grupu ida-ida ba buka sasán sira ne’ebé ema uza no soe ona hanesan botilla mamuk no aqua mamuk hodi utiliza halo resiklazen. Ikus liu liurai-feto presiza atu grupu ida-ida ho inisiativa rasik ba buka ai-oan atu kuda iha vazu nune’e bele ba kuda fali iha fatin ne’ebé ai-hun laiha. Envolvimentu labarik sira iha atividade no jogu ida ne’e nakonu ho entuziazmu no kriatividade hodi la sente kole too atividade sira remata.
Jogu hirak ne’e nu’udar atividade ida atu sensibiliza labarik sira hatene tau-matan, hamoos no haburas ambiénte hodi kumpri empeñu ne’ebé komunidade halo hamutuk ho labarik sira ba festa Me. Jerál nian: “Ami sei tau-matan ba ami nia kampu hodi moris tuir Laudato-Si nia hanorin liu husi eduka-an no eduka malu atu halo ambiénte sai moos no furak.”
Remata tiha atividade sira, labarik sira halibur hamutuk fali no Ir. Jacinta demonstra ba labarik sira kona-ba kriatividade oinsá halo resiklajen hodi utiliza sasán sira ne’ebé ema soe, sai fali buat furak ne’ebé bele uza. Atividade hirak ne’e grupu ida-idak sei halo hafoin mak 
sei loke feira resiklajen nian iha festa Me. Jerál nian.
Labarik sira mós dekór tiha lema ba kuidadu rai nu’udar ita hotu nia uma: “Rai ne’e lulik: keta halo foer nia”.
Nu’udar FMA ita presiza duni atu sai kriativu hodi kapasita-an ho kriatividade oioin nune’e ita bele transmite fali ba labarik no foin-sa’e sira iha ita-nia apostoladu tanba labarik sira entuziazmu no iha hakarak atu aprende. sira presiza ema atu orienta no tulun sira atu dezenvolve abilidade ne’ebé sira iha. Atu hatán ba nesesidade ida ne’e presiza ita hotu nia disponibilidade.
(Albina do Carmo FMA)
