Dili – Ir Maria Assunta Sumiko Inoue, Konselleira Vizitadora, konsege halo enkontru “onlife” ba Irmán Perpétua sira ho tópiku kona-ba “Kolókiu iha FMA nia moris”. Loloos nia prepara tópiku seluk, maibé depoizde halo vizita uma sira “online” ka “ofline” nia muda ninia hanoin. Nia subliña katak “atu akompaña presiza husik ema akompaña”.
Irmán Assunta aprezenta nia reflesaun hodi foti husi Kódigu Direitu Kanóniku artigu sira 619 n0 630; foti husi Don Bosco nia “Hanorin sira no ezortasaun sira ba FMA” (Apéndise Konstituisaun FMA); foti husi artigu sira Konstituisaun FMA nian no husi Madre Ersilia Canta nia Buonanotte ba kapitulár sira Kapítulu Jerál XVI.
Superiora/a sira mak sira ne’ebé entrega iha sira nia liman, Irmán ka Irmaun sira no hamutuk servisu atu hari’i komunidade fraterna ida iha Kristu iha ne’ebé buka Maromak no hadomi Nia no maun-alin sira (Direitu Kanóniku kan. 619). Presiza iha konfiansa ba sira tanba “buat ida ne’ebé kontribui liu ba Kongregasaun relijioza ida nia lala’ok di’ak no ba ninia membru ida idak nia dame no ksolok” (Don Bosco). Don Bosco dehan katak “se prátika ‘rendiconto’ mak halo di’ak, uma laran sei la’o di’ak!”.
Madre Ercilia Canta dehan katak “Ba don Bosco laran-metin salezianu sira nian, FMA sira nian ho superiora sira, 
no mós ho foin-sae mane no feto sira, la’ós elementu opsionál ida, maibé esensiál, nune’e nia la simu kleru sira nia votos, maski sira ema di’ak, harohan-nain, estuda-nain, oserva-nain maibé taka-an no iha laran-metin oituan deit ba superiór sira, basá sira labele kolabora ba espíritu família iha ne’ebé importante tebes ba nia”.
Artigu #34 Konstituisaun FMA nian dehan katak “Momentu privilejiadu atu habiit komunaun, deskobre Maromak nia hakaran no hakle’an iha vida prátika Institutu nia espíritu, mak enkontru pesoál ne’ebé ita ida-idak sei iha ho ninia Superiora. Enkontru ida-ne’e sei halo fulan-fulan, iha klima fiar no karidade nian, iha konfiansa, lealdade no segredu resíproku. Hodi halo nune’e, enkontru pesoál sei sai – tuir don Bosco nia hanoin- elementu troka-laek ba kreximentu pesoál no komunitáriu iha ita-nia identidade Filha de Maria Auxiliadora nian”.
Ita-nia enkontru pesoál la’ós atu halo “relatóriu serbisu nian”; ita-nia enkontru pesoál atu fahe kona-ba ita-nia dalan espirituál tuir ita-nia Konstituisaun nia mata-dalan.
Iha komunidade sira, ita hein katak Irmán perpétua sira sai ezemplu moris iha aspetu kolókiu ne’e. Tanba juniora sira halo, maibé se perpétua sira la halo, saida ma sira tranzmite ba Irmán juniora sira? Se “imi ruma abanbairua sai diretora, maibé la halo esperiénsia akompañamentu liuhusi kolókiu oinsá imi akompaña?”, Irmán Assunta husu.
(Comsoc FMATIN)
