Editoriál:
Akompañamentu pesoál: instrumentu ba dixernimentu
Dixernimentu mak liafuan klásiku ida tradisaun Igreja nian. Eziste dixernimentu sinál sira tempu nian, ne’ebé haka’as an iha rekoñesimentu kona-ba Espíritu nia prezensa no asaun iha istória; dixernimentu morál, ne’ebé distinge buat di’ak husi buat aat; dixernimentu espirituál, ne’ebé propoin atu rekoñese tentasaun atu rejeita no, iha kontráriu, bá oin iha dalan plenitude moris nian.
Espíritu ko’alia no atua liuhusi akontesimentu sira iha ema ida-idak nia moris, maibé eventu sira mumun (ko’alia-laek) no ambíguu, basá ema bele interpreta iha modu lahanesan. Leno ninia signifikadu atu to’o ba desizaun ida ezije perkursu ida dixernimentu nian. Verbu tolu ne’ebé Evangelli Gaudium, 52 uza atu deskreve dixernimentu – rekoñese, interpreta, hili – bele tulun ita delinea itineráriu adekuadu ida ba indivíduu nune’e mós ba grupu sira no komunidade sira.
Atu bele deside presiza iha instrumentu sira atu rekoñese Na’i nia bolun ba ksolok domin nian no deside fó resposta ida ba nia.
Entre instrumentu sira, tradisaun espirituál tau iha evidénsia importánsia akompañamentu pesoál. Atu akompaña ema seluk, la’ós sufisiente estuda teoria dixernimentu nian; presiza moris iha kulit rasik esperiénsia atu interpreta movimentu sira fuan nian atu iha sira rekoñese Espíritu nia asaun, ne’ebé nia lian hatene ko’alia ba ema ida-idak. Akompañamentu pesoál husu atu halo kro’at nafatin sensibilidade rasik ba Espíritu nia lian, hodi lori atu deskobre iha partikularidade pesoál sira rekursu ida no rikusoin ida.
Maromak rasik iha istória salvasaun nian hatudu oinsá akompaña, nune’e mós ita-nia fonte saleziana sira fó ezemplu oioin.
Mai ita aprende!
