Prepara fuan atu simu Jezús
Dili – Sr.Ermelinda SIlva, sr. Celina Seran no novísia na’in haat horisehik, 19 Dezembru ba fó retiru ba sarani sira iha bairu Betó A. Sira ne’ebé tuir retiru mak inan-aman no joven feto no mane sira, besik ema 150. Ami haksolok tebes , tanba, maski buat barak oin-oin mak mosu sarani sira nia moris, maibé sarani barak mak sei fó importánsia ba sira nia obrigasaun sarani nian no sira nia moris espirituál nian, hodi tuir retiru no halo konfisaun. Sr Celina ko’alia kona-ba Tinan Fiar nian no Sr Ermelinda koalia konaba tema adventu nu’udar tempu preparasaun nian. Baibain liturjia adventu nian hatudu sai mai ita, ema naran boot na’in rua nu’udar modelu atu ita tuir iha tempu prepasaun / hadi’ak –an ba Natál. Ema na’in rua ne’e mak João Baptista no Virjen Maria.
Iha rai fuik maran João konvida ema atu fila fali ba dalan diak, atu bele hetan salvasaun.João hakilar dehan “ Hadi’a Na’I nia dalan,Halo’os Na’I nia dalan inuK.Taka rai klean hotu! Hatun foho tomak, áas no badak! Haloós dalan kleuk sira! Hatetuk dalan aat hotu! Hafoin kriatura tomak sei haree Maromak nia maksoin! “ (kf Evanjellu Lk 3, 3-6. ) Ita bele rona João nia lia fuan hirak ne’e,no husu ba ita nia an. Saida mak nu’udar dalan kleuk, rai klean, foho aas, no dalan aat iha ha’u nia moris? Se ita reflete didiak, buat hirak ne’e mak sai hanesan ita nia frakeza sira,ne’ebé teri netik ita iha ita nia hadi’a an ba Natal. Iha tempu adventu ida ne’e husu mai ita liu-liu atu muda ita nia hahalok sira, sukat ita nia lia fuan torka ita ita nia mentalidade sira, ka hakribit ita nia sala sira, reza no halo karidade ba sira ne’ebé presiza. Hodi halo nune’e mak ita idak-idak sei prepara presepio ida ne’ebé furak no kapaz iha ita nia fuan laran, nune’e ita hein, wainhira too iha tempo Natal, Jezús Kosok Oan bele mai hela iha presepio ne’e nia laran, hela ho ita haraik mai ita bensaun, paz, damen no domin , atu ita bele ba ita nia familia sira maun alin sira, hanesan Maria Virjen ne’ebé entrega –an tomak ba Maromak Ninia hakarak,hein ho ksolok, simu Jezús iha nia knotak, atu fo salvasaun ba ema barak. Nune’e ita husu ba Virjen Maria tulun ita atu halo preparasaun didiak liu-liu prepasaraun vida interior ka fatin prepara presepio fuan nian, atu Maromak aas no boot liu, ne’ebé halo –an ki’ik oan mai hela iha ita, gia no tau matan mai ita durante tinan tomak too fali iha Natal 2013 tinan oin mai.Boas Festas do Santo Natal e Feliz Ano Novo!!!!
