Comoro, 16-23 Janeiro 2025
Iha tempu grasa nian ne’ebé Institutu fo, liu-liu iha okaziaun retiru anual nian mak tempu oportunu ba irman ida-idak para hodi fo tempu atu rona Maromak ne’ebé koalia mai ita husi Ninia Liafuan rasik no loke-an ba Espirito Santo ne’ebé sai matadalan uniku ba ita nia renovasaun espiritual no lao hamutuk ho Kreda hodi sai peregrinu sira esperansa nia iha tinan santo Jubileu nian.
Tamba ne’e, pregador ba ami nia retiru ida ne’e mak Pe. Antonio Transfiguração Pinto SDB, iha nia pregasaun sira koalia no haklean kona tema Jubileu Ordinariu 2025 nian no Estreia Reitor Mor Salesiano nian ne’ebé koalia kona peregrinu sira Esperansa nian. Tema sira ne’ebé pregador desenvolve liu husi nia konferensia sira mak tuir mai: signifikadu ba Jubileu no peregrinus da esperansa, Esperansa iha kontestu Biblia nian, virtude teologico sira, ba Maromak hamutuk ho foinsa’e sira, misteriu moris iha Esperansa no fiar, Maria mak paradigma iha moris esperansa nian, hafoun-an no haburas-an tuir Kristu nia karakter no rekonsiliasaun mak dalan ba Kristu nia reinu.
Iha fonte karismatiku nian, liu-liu ir. Evangelina Xavier- Inspetora TIN iha nia boa noite sira, fo hanoin fali ba irman ida-idak atu sai fiel nafatin ba matadalan moris nian ne’ebé Fundador sira husik hela mai ita nu’udar Evanjellu daruak kongregasaun nian. Tema sira ne’ebé haklean kada boa noite mak tuir mai ne’e: Identidade FMA, Votu sira: castidade, pobreza no obediensia, moris orasaun nian no moris fraterna nian.
Pregasaun sira ne’ebé furak mak nu’udar meio ida ne’ebé tulun ema atu tama klean liutan ba nia moris ho Maromak maibe formador los retiru nian mak Espirito Santo no Maromak nia Liafuan; tamba ne’e iha klima silensiu, reflesaun no kontemplasaun nian ema ida-idak hanook-an ba raronak Espirito Santo nian no iha selebrasaun sira sakramentu Eukaristia no Rekonsiliasaun nian ema ida-idak hakbesik hodi simu ho fervor Kristu nia Futar Isin no simu Nia domin laran sadia nian ho fiar no konfiansa tomak.
Nune’e ih loron ikus retiru nian, ho fuan Magnificat ami hahi Nai ho ami nia moris no saran-an nian ho Eukaristia solene, no irman juniores na’in sanulu (10) halo renovasaun ba sira nia votu iha ir. Maria Assunta nu’udar superior jeral nia delega nia liman.
Aleluia no boa misaun ba ita hotu!
Ir.Domingas da Silva, FMA
