Editoriál: Akompaña tanba simu akompañamentu
Ita hotu simu bolun atu sai maluk ba ema seluk, ba foin-sa’e sira, ba oan sira, ba maluk sira, akompañadór no akompañadora iha moris ida-ne’e. Ninia objetivu la’ós seluk, maibé ida-ne’ebé Don Bosco trasa ba ninia foin-sa’e sira: atu haree sira haksolok iha moris ne’e no iha eternidade.
Oinsá hahú, oinsá akompaña? Baibain ida ne’ebé iha kapasidade atu akompaña mak ida ne’ebé esperimenta ona “grasa” akompañamentu di’ak. Don Bosco iha grasa ida-ne’e ne’ebé marka ninia moris tomak.
Ita labele akompaña ema seluk se ita la iha ideia ida katak moris mak dalan eh lurón ida, no kristianizmu mak “dalan ida” (kf Apóstolu sira-nia Hahalok). Moris mak dalan ida, viajen ida: iha ain-hakat sira, etapa sira, parajen sira, meta ida, sinál sira… esperiénsia ida. La iha sentidu atu ita akompaña se ita la iha kultura ida-ne’e iha ita-nia laran, mentalidade ida-ne’e, espíritu ida-ne’e.
Bíblia nakonu ho ezemplu akompañamentu Maromak nian, ne’ebé liuhusi ninia Liafuan, ninia profeta sira, ninia Anju sira ho forma ema nian akompaña ema sira. Ita-nia Santu sira hatudu mós ida-ne’e: akompaña tanba sira rasik simu, tanba buat ne’ebé haraik degrasa mai ita atu ita fó fila ho modu gratuitu ba ema seluk.
Akompañamentu husu atu ita-nia moris sai sasin, rona, halo dalan, personaliza, propoin, mantein kontinuidade fiu istória pesoál nian no avalia ita-nia ain-hakat sira.
Husi Maromak nia Liafuan no husi ita-nia Santu sira, mai ita aprende arte atu husik Maromak akompaña ita liuhusi ninia mediasaun sira no sai akompañadór/a ba maluk sira seluk.
Boa continuação do caminho!
