Editorial:
Aprende atu moris nudar “peregrinu sira esperansa nian” iha ne’ebé Papa Francisco husu mai ita, mak eventu ida ne’ebé se halao didiak bele sai nudar okaziaun ida ne’ebé furak tebes ba umanidade tomak, basà iha tempu ne’e, ne’ebé marka husi instabilidade, dezastre naturais no tauk. Se ita hateke haleu ita, iha buat oin-oin hanesan funu, kiak hamlaha, konfiliktu sosial, dezastre ambiental no naturais, ne’ebé halo ema dala ruma lakon esperansa. Mundo sai nakukun ba bei-beik. Iha situasaun ne’e, la bele sai pasivu, taka iha ita nia mundu no rende deit, maibé ita iha oportunidade bo’ot ne’ebé Kreda oferese tinan tomak mai ita, atu moris iha esperansa nia laran. Jubileu mak hawain ksolok no esperansa. Ksolok hasoru malu entre Kreda no ema sira nia preciza, liu-liu perdaun. Papa Francisco hili Tinan Santu ho sinal esperansa nian: «Ema hotu hein», nia hakerek. «Iha ema sira nia fuan haksumik hela esperansa nudar hakarak no hein ba buat diak, mezmu lahatene loron aban sei lori saida. Inseguridade ba futuru hamosu sentimentu sira dala ruma kontra fali: husi laran-metin ba tauk, husi hakmatek ba deskonfia, husi serteza ba laran rua-rua. Ita hasoru ema sira ne’ebé deskonfia ne’ebé haré ba futuru ho sceticizmu no pesimizmu, hanesan laiha buat ida ne’ebé oferese ksolok ba sira. Atu Jubileu sai nudar okaziaun hametin fali esperansa». Nune’e haré metin ba Kristu ita nia Esperansa nia hun. Ita sei haklean Papa Francisco nia hanorin sira kona-ba “Jezús Kristu ita nia esperansa” ne’ebé tulun ita atu tama klean liu-tan ba Jubileu nia isin rasik. Esperensia loron 21 fulan abril, halo mundu tomak nia neon no matan tuir hela Papa Francisco liu-husi media sira oin-oin. “Lakon Bibi-atan iha Kreda”, maibé husik hela sasin furak no naran morin iha ema barak nia moris no fuan. Mai ita simu ho ksolok Tinan Santu ne’e, hodi moris didiak tinan grasa ne’e. Votos ba hotu-hotu Tinan Grasa nakonu ho novidade foun husi Na’i iha moris lor-loron nian.
Ir. Ernestina de Jesus Fatima, FMA
