Dili – Husi loron 10-11/9/2020 ami, ne’ebé halo “segundo noviciado”, hahú fali ami nia enkontru ho Me. Sebastiana FMA, ne’ebé lori ami atu tama kle’an liután hodi haree kona-ba ritu sira profisaun relijioza nian.
Atu halo profisaun perpétua uluknanai kandidata sira tenke tuir regra sira Kreda nian, ne’ebé fó sai katak atu halo profisaun perpétua tenke halo enkontru ho kandidata sira, fulan ida atu avalia fali nia moris ne’ebé durante nia hala’o iha nia etapa junioradu nian iha vida orasaun, komunidade no misaun. Iha ne’ebé mak kandidata sira aprende hodi haree ba sira nia moris, nune’e mós ho formadora sira ida-dak haree ba kandidata sira hafoin iha ne’ebá mak determina katak pronta ona atu halo votus perpétua ka la’e. Tan ne’e profisaun perpétua mak hahalok públiku no ekleziál kona-ba vida konsagrada ida indefinitivu husi Maromak. Aspetu sira ne’ebé riku liu iha FMA mak; linguajen, sobriedade, simplisidade, aspetu pedagóziku, gradualidade, progresivu no kriatividade.
Ritu sira profisaun perpétua nian iha parte walu mak; aprezentasaun candidate, interogasaun, orasaun ladainhas, profisaun, asina dokumentu iha Altar, orasaun solene ba konsagrasaun, simu no aprezentasaun símbolu ida (Koroa). No ami habadak tiha ba parte tolu tuir ami nia reflesaun. Nune’e iha ritu ida ne’e parte dahuluk iha partisipasaun sira mak hanesan; iha ritu aprezentasaun nian iha Irmán sira nia prezensa no Irmán ida nu’udar superior atu aprezenta ba kreda no Institutu no Irmán Ida ne’ebé reprezenta La Madre/ Institutu sei simu Irmán kandidata iha Kreda no nu’udar familia ida ne’ebé hola parte ona ba Institutu. No ida ne’ebé reprezenta Kreda mak Nailulik ne’ebé sei diálogu, husu, selebra Eukaristia no harohan ba kandidata nia fidelidade. Nune’e mós iha povu ne’ebé tuir selebrasaun ne’e, hodi fó sasin kona-ba kandidata nia saran-an ida ne’e. Iha parte daruak ita hetan símbolu 3 ne’ebé importante liu mak:
Fórmula profisaun nian: ne’ebé riku ho liafuan promesa nian no iha senditu klean tebes atu halo promesa iha Maromak nia Altar Santu nia oin, iha Kreda no iha povu hotu nia oin hodi saran-an totál ba Kristu hodi moris iha familia ida, mak familia Institutu FMA nian.- Asina dokumentu iha Altár leten: tanba Altar ne’e rasik mak hasantu promesa ka asina ne’e, no ita asina iha meza Kristu nia Isin no Raan nian. Nune’e buat ne’ebé Santu keta soe ba asu sira.
- Koroa: sinal kazamentu nian ho Kristu hodi hola parte ona ba Kristu nu’udar Liurai maibe sai atan tanba domin. Nune’e, tuir ita nia karizma atu serbi labarik no foin-sa’e sira, hodi lori sira ba Kristu atu bele salva klamar sira no ita eduka sira tuir estilu DB no MM nia projetu ne’eb hetan inspirasaun husi kristu Bibi Atan Diak nia karidade.
Iha parte datoluk nian mak orasaun no bensan finál nian, ne’ebé hatudu katak ita la’o hamutuk ho Kreda, nune’e mós kreda nafatin lao hamutuk ho ita, hodi akompaña ita ho orasaun, saran ita iha kristu, saran mós ita ba Maromak Santíssima Trindade nia tulun, iha Nain Feto nia protesaun no Santu/a sira nia intersesaun hodi fó bensan nafatin ba ita nia moris ka fidelidade. No bensan ne’ebé ita simu no hodi Espíritu Santu nia kbiit mak sei tahan hau nia fidelidade. Buat hotu ne’ebé hau promete iha profisaun mak sei realiza iha moris lor-loron hodi konxiente nafatin katak hau saran-an ba Kristu hodi sai atan tan domin, hodi simu buat hotu ne’ebé Institutu husu, serbi misaun ne’ebé Institutu entrega no hala’o buat hotu ba Institutu nia diak no lori ba Kristu tanba Nia mak bolu no haruka ba misaun. Tan ne’e buka atu halo Kristu sai sentru iha fuan no 
moris, hodi halo atividade hotu fó de’it Gloria ba Maromak. Tan ne’e presiza estuda, reflete no reza rituál ida ne’e atu bele tama klean didiak molok halo profesaun, atu bele selebra ritu ne’e ho partisipasaun tomak no konxiente. No halo ema hotu konxiente katak sasukat relijioza nian ne’ebé loos mak ba nafatin no totál, tanba buat hotu ne’e bele akontese tan Maromak nia grasa la’os ema nia esforsu.
Nune’e husi ami nia fuan ami hakarak agradese ba Inspetoria ne’ebé fó tempu mai ami atu haklean liután ami nia formasaun sira, hodi prepara no forma an didi’ak iha etapa segundu novisiadu nian ne’e. No ami agradese mós ba Me. Baty ne’ebé tulun ami atu komprende no hakle’an ritu sira profisaun nian, ne’ebé iha sentidu no valór ne’ebé riku no signifikadu tebes ba FMA ida nia moris. Ami fiar katak Maria Auxiliadora sei haraik bensan wain ba Madre. Agradese mós ba imi hotu nia orasaun, Maromak fó bensan ba ita hotu.
Obrigada Barak.
(Onesiana-Fatima-Marta)
