Ohin Kreda selebra festa Santu Apóstolu na’in rua Jezús Kristu nian.
Hanesan S.Pedro no S. André, S. Filipe mós mai husi rai Betsaida Galilea. Rona Na’i nia bolun iha loron hanesan ho S. Pedro no S. Andre. Tuir Clemente husi Alexandria, dehan katak Filipe mak apóstolu ida ne’ebé husu ba Mestre Divinu fó lisensa atu ba hakoi nia aman. Nune’e Mestre hatán ba nia: “ Ó tuir Ha’u mai, husik matebian sira hakoi sira nia mate”. Nune’e mós iha han-kalan ikus nian ho Mestre, nia mak ida ne’ebé husu Mestre atu hatudu Aman Maromak nia oin no Mestre hatán ba nia “ema se mak hare Ha’u hare Aman”.
Husi Filipe mak Natanael koñese Mestre: “ Ami foin hetan Ida ne’ebé Moises iha ukunfuan no profeta sira fó sai nanis, katak Jezús, José nia oan, husi Nazaré”. Apóstolu ne’ebé hatudu karakterístika sasin loloos Mestre nian. Hasoru Mestre, hela ho Nia, hare iha Nia Aman Lalehan nia oin no konvida mós ema seluk atu bele hasoru Mestre.
Liutiha loron Pentekoste, Filipe tuir mandatu Mestre nian ba haklaken Evanjellu iha rai Grecia, hafoin ba Frigia iha sidade Hierópollis. Iha ne’ebá simu koroa martíriu nian hodi hedi iha krús.
Saun Tiago, Menor – Kiik, ne’ebé hanaran Tiago Alfeu nia oan, moris iha Kaná Galieia Jezús Kristu nia primu no autór karta S. Tiagu nian. Iha livru Apóstolu sira nia hahalok relata katak nia mak Bispu dahuluk iha Igreja Jerusalém ( AT. 21, 18 – 26) iha tinan 36-37. Apóstolu ida ne’ebé moris ho santidade estraordinária sai sasin loloos fiar nian to’o fakar ran. Iha nia karta hateten katak fiar la ho hahalok mak mate. Sai mártir iha tinan 62. Judeu sira tuda mate nia hanesan Estevão.
