Baucau – Formasaun animadór no animadora sira-nian sai prioridade ida ba komunidade FMA Baucau, basá joven barak ne’ebé oferese an presiza formasaun baze kona-ba saida mak animasaun no identidade animadór/a nian iha estilu salezianu.
Tanba nesesidade ida-ne’e mak, ohin loron 21 Fevereiru, animadór/a husi Oratóriu Teulale, Oratóriu Diwake no grupu Infánsia Misionária na’in 20 halibur hamutuk iha komunidade FMA S. Teresa d’Avila atu halo enkontru formativu kona-ba sai animadór/a salezianu. Formasaun ne’e Ir Jacinta Gusmão mak fasilita. Iha ninia aprezentasaun, Ir Jacinta Gusmao, hahú hodi haree sira-nia pre-komprensaun kona-ba liafuan “animasaun” no “anima”. Joven sira hateten katak “anima” signifika klamar. No husi ne’e Ir Jacinta husu ba sira “karik isin ida laiha klamar, nia bele moris?” Nune’e mós oratóriu no grupu sira se la iha animasaun no animadór sira nia sei la moris. Animasaun mak asaun sira ne’ebé organiza no projeta hamutuk ne’ebé nia finalidade mak promosaun signifikadu moris nian ba ema sira, atu haboot ema nia entuziazmu no kbiit, esprime an rasik, halo sira partisipa iha grupu liuhusi intervensaun oioin nu’udar espresaun kulturál, jogu, dansa, kanta, rekreiu, teatru, hodi envolve ema ne’e ba beibeik.
Hafoin, pergunta tuir mai mak sá loos identidade animadór/a nian? Animadór/a mak edukadór/a ida, maibé nia konxiente kona-ba regra “osan-mean” rua: “Ha’u labele fó buat ne’ebé ha’u la iha!” no “Hau labele saran an se ha’u la soi/possui ha’u nia an!” Tan ne’e mak nia hatene katak nia presiza forma na nafatin. Animadór/a la’ós ema perfeitu, maibé ema ne’ebé halo nia dalan, iha konxiénsia katak aleinde anima no eduka grupu ida labarik/foin-sa’e sira nian, nia eduka uluknanai nia an rasik. Sai animadór/a la’ós obrigasaun ida maibé hilin ida ne’ebé ita simu bolun atu halo: hela ho la
barik sira, hodi halo animasaun nu’udar estilu ida moris nian, modu ida atu tranzmite esperiénsia ida.
Nu’udar reflesaun sira simu pista 3 atu hatán pesoalmente no fahe iha sira nia grupu iha momentu seluk mak: 1) Tansá ha’u halo animasaun? 2) Animadór/a ida-ne’ebé ha’u hakarak sai? 3) Sá de’it karakterístika sira ne’ebé animadór/a ida tenke iha?
