Maun no biin-alin sira, bondia!
Evanjellu domingu ne’e nian, datoluk Kuarezma nian, aprezenta mai ita Jezús nia diálogu ho Samaritana (kf Jo 4,5-42). Enkontru ne’e akontese enkuantu Jezús liuhusi Samaria, rejiaun entre Judeia no Galilea, ema ne’ebé Judeu sira despreza mak hela bá, hanoin sira nu’udar sismátika ni erétika. Maibé populasaun ne’e mak entre sira uluk liu atu adere ba Apóstolu sira-nia pregasaun sarani. Enkuantu eskolante sira ba iha aldeia atu buka ai-han, Jezús hela iha posu ida no husu husi feto ida atu hemu, ne’ebé mai atu kuru bee. No husu pedidu ida-ne’e hahú diálogu ida. “Oinsá mak ó judeu ida hakarak husu buat urma ba samaritana ida?”. Jezús hatán: se ó hatene sé mak ha’u, no don ne’ebé ha’u iha bá ó, ó mak sei husu mai ha’u no ha’u sei haraik ba ó “bee moris”, bee ida ne’ebé halakon hamrook hotu no sai bee-matan rohan-laek iha fuan ne’ebé hemu (vv. 10-14).
Bá iha posu atu foti bee halo sai kolen no xatu; furak tebes se bele iha bee-matan ne’ebé bee suli nafatin! Maibé Jezús ko’alia kona-ba bee seluk. Bainhira feto ne’e nota katak mane ne’ebé nia ko’ali aho mak profeta ida, nia konfia nina moris rasik no hato’o kestaun relijioza sira. Ninia hamrook ba afetu no moris nakonu la hetan satisfasaun husi la’en na’in lima ne’ebé nia iha, loloos nia esperimenta deziluzaun no enganu. Tanba ne’e feto ne’e sente impresaun boot ba respeitu ne’ebé Jezús iha ba nia no bainhira nia ko’alia kona-ba fiar loos nian, nu’udar relasaun ho Aman Maromak “iha espíritu no lia-loos”, entaun nia intui katak mane karik Mesias, no Jezús – buat ruma la’ós beibeik – konfirma nia: «Ha’u mak nia, ne’ebé ko’alia ho ó» (v. 26). Nia dehan nia mak Mesias ba feto ida ne’ebé iha moris ida dezordenada loos.
Maun-alin sira, bee ne’ebé haraik moris rohan-laek, hasuli itha oha iha ita-nia fuan sira iha loron ita-nia batizmu nian; entaun Maromak nakfilak ita no hakonu ita ho nia grasa. Maibé karik ita haluha tiha don boot ida-ne’e, eh redús de’it ba dadus pesoál; no karik ita bá buka “posu sira” iha ne’ebé nia bee sira la hasai hamrook. Bainhira ita haluha bee loos nian, ita bá buka posu sira ne’ebé la iha bee moos. Entaun Evanjellu ida-ne’e mai ita duni! La’ós de’it ba samaritana, mai ita. Jezús ko’alia mai ita hanesan ba Samaritana. Loos, ita hatene ona, maibé karik ita seidauk hasoru nia pesoalmente. Ita hatene sé mak Jezús, maibé karik ita seidauk hasoru nia pesoalmente, hodi ko’alia ho Nia, no ita seidauk rekoñese nia nu’udar ita-nia Makso’ik. Tempu Kuarezma nian ida-ne’e mak okaziaun di’ak atu hakbesik ba Nia, hasoru nia iha orasaun iha diálogu ida fuan ho fuan, ko’alia ho Nia, rona Nia; okaziaun di’ak atu haree ninia oin iha maun/-alin eh biin-alin terus-na’in nia oin. Ho modu ida-ne’e ita bele hafoun iha ita grasa Batizmu nian, halakon ita-nia hamrook iha bee-matan Maromak nia Liafuan nian no ninia Santu Espíritu; no nune’e deskobre mós ksolok sai mahalok sira rekonsiliasaun nian no instrument dame nian iha moris loroloron nian.
Virjen Maria tulun ita atu ba nafatin hakbesik bag rasa, ba bee ne’ebé suli husi fatuk katak Kristu Makso’ik, atu ita bele profesa ho konviksaun ita-nia fiar no haklaken ho ksolok Maromak nia domin nia maravilla sira, laran-sadia no hun ba di’ak hotu.
