Profisaun Perpetua FMA 2014
Dili – Ho profisaun relijioza perpétua ema ida simu ho modu definitivu Maromak nia konvite ne’ebé hakarak konsagra ema ne’e totalmente ba nia An. Nun’e ohin, 15 Agostu, iha solenidade Asunsaun Maria Virjen nian, irmán Lígia Sarmento Fátima no irmán Jacinta de Deus, liuhusi votus kastidade (hakaran atu hadomi Maromak liu buat hotu atu habelar Ninia domin iha mundu ba ema ida-idak), obediénsia (entrega vontade rasik) no pobreza (renúnsia espontánea soin materiál nian) haklaken ba ema hotu katak iha Maromak nia oin buat hotu relativu.
Sira, hamutuk ho Filhas de Maria Auxiliadora 13.000 iha mundu tomak, hili atu halo Maromak “sira nia buat tomak iha moris” atu lori ba foin-sa’e sira Jezús. Hanesan Don Bosco no Madre Mazzarello, FMA sira serví foin-sa’e sira, liuliu sira ne’ebé kiak liu hodi eduka no evanjeliza.
Selebrasaun ne’e hala’o iha parókia Maria Auxikiadora, Comoro-Dili, selebra husi p. João Paulino Aparício Guterres SDB (provinsiál) ho konselebrante na’in 17, inklui D. Rodrigo (reprezentante Núnsiu Apostóliku nian).
Iha omilia padre João Paulino, halo paralelizmu entre Maria nia Magnificat (Lc 1,39-56) no FMA nia moris ne’ebé tenke sai Maria nia retratu iha mundu ne’e. Hodi dirije ba irmán Lígia no irmán Jacinta nia dehan katak se Maria hahí Maromak no haksolok tanba “Maromak fihir nia husi mukit no folin-laek sira atu sai Maromak nia inan rasik” nune’e mós Maromak la fihir de’it maibé hili atu “la’ós de’it serví foin-sa’e sira ka serví kongregasaun, maibé liuliu hahí Maromak iha misaun tomak ne’ebé imi sei hala’o imi imi-nia moris tomak”. Se Maria dehan katak beioan hotu sei haklaken rahun-di’ak kona-ba nia, ba irmán sira mós ema sei tane, sei bolu madre, irmán, maibé “imi-nia misaun atu sai Maria seluk, husi jerasaun ba jerasaun”. Tuir Padre João, Don Bosco rasik hakarak bainhira harii Institutu FMA, nia hameno hela ba nia irmán sira atu “sai Maria ne’ebé moris ba foin-sa’e sira”.
Iha parte ikus omilia nian padre João husu ba Família Saleziana atu moris tuir Na’i-Feto nia ain-fatin sira, “prontu nafatin atu moris iha dalan Maromak nian ho misaun atu so’i klamar sira. Ho Bisentenáriu Don Bosco nia moris nian, hamutuk no ho foin-sa’e sira mai ita serví Maromak iha ema ki’ik no mukit sira”. Nia mós agradese ba família sira ne’ebé saran oan-feto sira ba Maromak: “Lakon karau ida maibé manán soin lalehan”. Iha loron 17 Agostu mós sei iha ordenasaun amlulik salezianu na’in-rua. Profisaun perpétua FMA nain rua no ordenasaun amlulik SDB na’in rua sai don ida ba Don Bosco no husi Don Bosco ba Maromak no foin-sa’e sira.
Madre Paola Battagliola (inspetora FMA TIN) iha ninia liafuan ba asembleia molok taka misa, husu partisipante hotu atu reza ba sira nia kompromisu fidelidade nian, hodi “sai fiél ba nafatin iha sira-nia moris” no “atu sira hamanas laran-manas ‘da mihi animas’, haboot sira-nia fuan domin nian”. Nia mós enkoraja irmán Lígia no irmán Jacinta atu keta ta’uk, basá Maromak horik nafatin iha sira-nia sorin, lori iha Ninia kabaas.
Festa remata ho almosu hamutuk iha salaun João Paulo II.
