Fuiloro – Iha Loron 24 Juñu Sábadu, iha komunidade Don Bosco Fuiluro, halo enkontru animadores Zonal, ne’ebé partisipa husi animadores sentru Lospalos no sentru Fuiluro, partisipantes sira ne’e mai husi sentru oi-oin, animadores sira ne’ebé marka prezensa hamutuk 200 pessoas , 90 husi sentru lospalos no 110 husi SDB no FMA Fuiluro. Enkontru ida ne’e halao iha tuku 3.15 otl, to’o remata. Molok oradores sira atu hato’o sira nia tópiku, hahu uluk ho jogos ne’ebé ho nia objetivu atu haree kona ba animadores sira nia serbisu hamutuk iha grupo, grupo ne’ebé mak kolabora diak no lalais liu sira mak sai nudar vensedor. Depois de jogos Pe. Alarico,SDB hahu aprezenta topiku ne’ebé nia fahe, kona-ba: “Sakramentu Eukaristia no Sakramentu rekonsiliasaun no peniténsia”
- Eukaristia lori ita hanoin kedas kona ba Jesus nia futar isin no ran.
- Eukaristia katak agradesementu, iha ne’ebé Jesus fo Nia isin no ran ita han atu ita hetan salvasaun.
- Pontu importante rua iha selebrasaun Eukaristia:
- Liturjia da Palavra
- Liturjia Eukaristika
- Eukaristia mak hun no tutun sarani sira nia moris
Wainhira ita selebra Eukaristia ,ita moris hamutuk ida deit ho kristu tanba ita han n hemu Jezús nia isin no ran.
- Eukaristia mak sakramentu santu liu, iha ne’eba Jezús fo nia isin no Nia ran hodi marka ninia prezensa real iha ne’eba.
- Objetivu selebrasaun Eukaristia: nudar selebrasaun hasae agradese nian ba Maromak, tanba Nia domin boot b ita ema to’o fo nia Oan mane atu salva ema.
Sakramentu rekonsiliasaun
Tanba sa, Ita presiza sakramentu rekonsiliasaun?, tanba ita sai inimigu ho Maromak nune’e ita presiza rekonsilia fali ho Maromak.
- Iha pasajen bibliku Antigu Testamentu nian, Maromak buka buat ruma ne’ebé Kain presiza dehan sai mak konfesa nia sala ho laran tomak. Povu Israel hakarak atu rekonsilia ho Maromak, sira hasae sakrifisiu hodi oho animal, nune’e animal nia ran bele kasu sira nia salan, maibe iha novu testamentu laos sakrifisiu mak badame ema ho Maromak maibe Jesus rasik.
- Pontu importante tolu iha sakramentu konfesoens
- Hakribit ita nia sala
- Konfesa sai ita nia sala ba amlulik
- Simu penitensia no absolusaun husi amululik hodi kumpri tuir ita nia penitensia ne’ebé amululik fo.
- Fruto husi sakramentu rekonsiliasaun:
- Hadame ita ho Maromak
- Livre husi kastigu permanente no temporal
- Dame ho konsiensia ne’ebé hakmatek no konsolasaun
- Hadame ita ho kreda no maluk sira.
- Pasu sira ne’ebé hatudu katak sarani sira hakarak lao iha dalan konversaun nian mak:
- Konsiente hodi dehan sai
- Iha hakarak atu la halo sala tan
- Hakarak hadia-an hodi moris foun
Ida ne’e mak rezumo badak ne’ebé ami sita, tuir mai iha animadores balun ne’ebé sei fahe sira nia reflesaun no esperiensia kona ba formasaun ne’e.
- Husi Denilson Virgilia.M Dias Marçal, animador husi sentru Lospalos, katak: “ sakramentu Eukaristia no konfesa fo influensia boot tebes ba ha’u nia moris, liu-liu iha aspetu rua umanu no espiritual nian. Iha aspetu umanu nian halo ha’u sai boot iha ha’u nia mental no sai forsa no boot, no iha aspetu espiritual nian haboot liu tan ha’u nia fiar no domin ba Jezús.
Ho formasaun kona ba Sakramentu Eukaristia no konfesoens, halo ha’u konsiente teb-tebes hodi loro-loron fo valorizasaun ba selebrasaun ne’e, tanba ida ne’e mak eventu ne’ebé boot liu.liu-liu iha momentu Transubtansiasaun halo ha’u fiar duni katak Jezús Nia prezensa real iha hau nia moris.
- Husi Jina Cardoso , Animadora Lospalos nian katak: “ sakramentu Eukaristia no konfesa influensia tebes ha’u nia moris nudar animadora ida, tanba sakramentu Eukaristia mak sai nudar hun ba ita nia moris, liu-liu ba ha’u ne’ebé hakarak sai apostolu Kristu nia hodi serbi labarik sira nudar animador, presiza fo sasin fiar nian ba ha’u nia oratorioano sira iha ha’u nia misaun.
- Husi Bruno Ximenes, animador lospalos, katak: “sakramentu Eukaristia no konfesa influensia tebes ha’u nia moris nudar animador, sakramentu ne’e mak fo nafatin korajem mai ha’u atu ha’u bele halao ho diak ha’u nia knaar iha misaun, liu-liu lori Jezús ba labarik no foinsa’e sira ne’ebé ha’u hasoru iha oratorio.
- Husi Leandro Fernandes ,animdor husi Titilari, katak: “sakramentu Eukaristia no konfesa influensia ha’u nia moris, tanba sakramentu ida ne’e mak fo mai ha’u kbiit atu moris liu-liu iha parte espiritual nian, no ho tempu hanesan fo mai ha’u kbiit atu hasoru knaar ne’ebé ha’u asume nudar animador, tanba ida ne’e nudar esperiensia foun mai ha’u, nune’e ha’u lahatene no tauk wainhira koalia ba labarik no joven sira, maibe ho Jesus nia isin ne’ebé loro-loron ha’u simu fo tebes forsa mai ha’u iha ha’u nia moris.
Ida ne’e mak informasaun badak ne’ebé ami hakarak fahe, obrigado barak.
(Maria Sarmento Guterres)
