Papa Francisco nia katekeze – 2 Abríl 2014
Katekeze kuarta 2 Abríl nian, Papa Francisco dedika ba matrimóniu eh sakramentu kaben no ho ne’e taka siklu katekeze sira kona-ba sakramentu.
Francisco destaka katak sakramentu ne’e lori ema ba sentru Maromak nia planu nian, katak hakaran aliansa no komuñaun nian. Maromak kria ema atu hadomi, nu’udar reflexu Ninia domin nian.
Asesu Katekeze ho lia-portugés
“Iha uniaun konjugál, mane no feto realiza vokasaun ne’e no sinál resiprosidade no komuñaun moris nakonu no definitivu. Bainhira mane no feto ida selebra sakramentu kaben, Maromak, ita bele dehan, reflete iha sira: imprime iha sira Ninia trasu rasik no karákter momoos ninia domin nian. Matrimóniu mak íkone Maromak ho ita nia domin”.
Ho forma hanesan, Santu Padre esplika, Maromak mak komuñaun iha Aman, Oan no Espíritu Santu, ne’ebé hori uluk kedas moris iha uniaun perfeita. Ne’e mak loos duni, mistériu matrimóniu nian: Maromak halo ema na’in rua sai ezisténsia ida de’it.
Papa hatutan tan katak ligasaun loos ho Maromak mak ida bainhira família reza, bainhira laen reza ba feen no vise-versa, ligasaun ne’e mantein no sai forte. Francisco rekoñese katak iha difikuldade sira iha moris kaben-na’in nian no istori malu mós – “dalaruma, bikan sira semo!” –, maibé ida-ne’e labele sai motivu tristeza nian.
“Kondisaun umana mak hanesan ne’e. Maibé segredu mak domin maka’as liután bainhira istori malu. Tanba ne’e, ha’u fó konsellu ba kaben-na’in sira, nafatin atu keta remata loron ne’ebé istori malu hodi la halo dame. No atu halo dame la presiza bolu Nasoens Unidas! Presiza de’it jestu ki’ik ida, kariñu ida”.
Dala ida tan, nia fó hanoin kona-ba liafuan-xave tolu ba vida kaben-na’in nian: lisensa, obrigadu no deskulpa. “Ho liafuan tolu ne’e, ho orasaun husi laen ba feen no husi feen ba laen no hodi halo dame, molok loron remata, matrimóniu bele ba oin”.
