Maria Domenica Mazzarello no S. Teresa nia espiritualidade
Iha formasaun espirituál Maria Domenica Mazzarello nian bele nota S. Teresa d’Ávila nia influénsia boot, diretamente liuhusi leitura ba ninia obra ruma (ezemplu “A vida”), nune’e mós indiretamente liuhusi padre Giuseppe Frassinetti nia mediasaun, amigu boot no “mestre” padre Pestarino nian. Ninia obra axétika sira nakonu ho doutrina Santa ne’e nian.
“Figlie dell’Immacolata” nia formasaun parte boot “teresiana” iha konseitu orasaun nian, iha “amizade espirituál sira” ho finalidade atu tulun malu to’o ba santidade. Hodi serbisu formativu Frassinetti nian, “Figlie dell’Immacolata” koñese parte ruma “Caminho de perfeicão” nian haktuir iha kontributu: “Pater noster di S. Teresa di Gesù. Trattato della preghiera (Parma 1860)” ne’ebé nia rasik elabora hodi foti husi espiritualidade S. Teresa nian.
Sasin foti husi Madre Petronilla nia biografia haktuir buat ruma interesante kona-ba ne’e. Bainhira otas ferik nia gosta hanoin filafali leitura sira ne’ebé leno tinan foin-sa’e sira Maria Domenica nnian. “Ha’u dalabarak hetan nia okupada iha leitura pedidu sira “Pater noster di Santa Teresa”. Bainhira ha’u to’o, nia pasa livru mai ha’u atu lee ho lian maka’as pasajen ida no repete fali ba nia ho ha’u-nia liafuan sira. Kona-ba komentáriu, nia mak hanoin no nia halo ho simplisidade murak. Nia gosta tebes lee livru ne’e no buka atu halo ha’u gosta […]. Nia halo ha’u hakerek S. Teresa nia fraze sira ne’ebé ko’alia kona-ba Maromak nia prezensa” (MACCONO, Suor Petronilla Mazzarello 84).
Aleinde ne’e, “Figlie dell’Immacolata” sira lee livru sira: “Le amicizie spirituali, imitazione di S. Teresa” ne’ebé Frassinetti publika iha Genova iha 1853. Kona-ba ne’e Maccono dehan “hotu-hotu iha” livriñu sira-ne’e (Vol. I 62).
Don Bosco nia hilin
Don Bosco hili S. Teresa d’Ávila (1515-1582) nu’udar Patrona Institutu FMA nian, iha kontinuidade ho tradisaun espirituál “Figlie dell’Immacolata”. Ne’e mak espiritualidade ida lahó kontradisaun ka dikotomia. Iha nia buat tomak ema nian iha folin no hetan unifikasaun iha Maromak nia prezensa. No ida-ne’e halo hakfodak – iha ninia signifikadu profétiku – se ita enkuadra iha tempu reforma luterana, ho kor pesimizmu nian.
Santa Teresa hatene armoniza kontemplasaun no atividade kolen-laek, espíritu fiar nian no konkretude pedagójika, iha ninia orientasaun ba Irmán sira, interioridade no ksolok komunikativa, haraik-an no denúnsia korajoza kona-ba hahalok falsu sira ne’ebé impede dalan santidade nian.
Nia esprime esperiénsia espirituál iha perspetiva amizade ho Maromak no ho ema seluk.
Iha “O Caminho da Perfeição” Teresa revela oinsá importante “sente no hatudu ternura, sai sensivel ba Irmán sira nia terus no moras ki’ik sira” (7,5).
Defaktu, hetan Maromak katak horik iha domin no ksolok, katak hetan an rasik, manán liberdade espíritu nian nune’e haketak an husi buat mundanu no moris iha ksolok. Perspetiva integrál ida-ne’e, vizaun otimista ida-ne’e folin liu ba Don Bosco.
Iha vizita ida ba komunidade iha Alassio, Don Bosco husu ba FMA sira: “Imi hotu haksolok? No kontinua: “Ha’u hameno santidade, saúde, siénsia no ksolok! Imi hotu sai Santa Teresa sira! Imi hanoin bá katak demóniu ta’uk ema ne’ebé haksolok. Nia buka tenta imi ho deskorajamentu tan serbisu barak ne’ebé imi iha (nia ko’alia iha laboratóriu)” (MB X 648).
Iha Konstituisaun 1885 nian, Don Bosco aumenta iha artigu kona-ba Mestra novisa sira-nian: “S. Teresa hakarak Relijioza sira ne’ebé haksolok, sinsera no nakloke. Tanba ne’e Mestra Novisa sira-nian iha knaar atu halo ninia aluna sira sai hanesan ne’e, tanba Irmán sira ho karákter nune’e mak iha liu aptidaun atu inspira menina sira no ema sira tempu ne’e nian estima no domin ba piedade no ba Relijiaun” (Regole o Costituzioni per le Figlie di Maria SS. Ausiliatrice aggregate alla Società Salesiana, Torino 1885, Tit. IX,5).
Ita, FMA sira simu bolun atu banati tuir nia iha domin ba Maromak, ne’ebé hatudu iha paixaun ‘Da mihi animas cetera tolle’ iha edukasaun preventiva no iha korajen esperansa nian.
