Venilale – Festa boot Fundadór nian iha Venilale, ne’ebé bele dehan rai “Valdocco-Mornese”, rai saleziana, mak momentu tutun husi preparasaun sira halo iha loron sia nia laran ka novena. Missa solene iha loron 31 Janeiru, partisipa husi Família Saleziana no foin-sa’e sira inklui mós estudante no professor sira eskola públika sira prezente iha Venilale. Padre Salezianu sira konselebra ho Pe José de Sá nu’udar selebrante prinsipál no Pe. Júlio Mota mak fó omilia. Iha ninia liafuan nia husu subliña Don Bosco nia espiritualidade ne’ebé loos duni fó fuan santidade nian, no husu atu ida-idak dehan ba nia an “santidade mai ha’u mós”.
Hodi la’o ho Reitór-Mor nia Estréia, ne’ebé sai programa ba Família Saleziana tomak, durante Novena, reflesaun sira foka iha Santidade. Estréia nia tema mak “«Atu Ha’u nia ksolok hela iha imi» (Jn 15,11). Santidade ba ó mós”.
Defaktu, iha novena, prepara husi FMA sira komunidade Madre Mazzarello, ba loron neen dahuluk sira reflete kona-ba santidade foin-sa’e sira-nian, nu’udar fuan husi Don Bosco nia espiritualidade. Novena hahú kedas ho Laura Vicuña, hafoin, Ceferino Namuncurá, Alberto Marvelli, Oratorianu na’in lima husi Polónia, Franciszek Kesy no maluk sira, Teresa Valsé Pantellini. Konserteza koñese mós Francisco de Sales ne’ebé nia festa monu iha loron 24 Janeiru.
Loron tolu tríduu nian ka novena husi loron 7-9, dedika de’it ba Don Bosco, maibé hodi haree oinsá nia nu’udar foin-sa’e nia buka deskobre nia vokasaun no misaun liuhsui akompañamentu no dixernimentu, tuir itineráriu ne’ebé oferese iha Dokumentu Finál Sínodu Joven 2018: “Nia la’o ho sira; Sira nia matan nakloke; Sira hamri’ik kedas hodi bá”.
Durante novena iha mós Santa Missa partisipa husi foin-sa’e sira husi komunidade tolu SDB/FMA. Iha mós membru Família Saleziana seluk hanesan Salezianu Kooperadór, ADMA No Antigos/as Alunos/as ruma.
Ba alunas/os Escola Técnico-Vocacional Madre Mazzarello, sira mós selebra festa hosi estuda Don Bosco nia moris liuhusi haree filme Don Bosco nian no halo quiz Don Bosco. Aleinde ne’e iha preparasaun espirituál seluk, importante liu Don Bosco temi nu’udar liras santidade nian: Sakramentu Rekonsiliasaun.
Aleinde ne’e, ba fulan ruma hala’o tiha ona atividade desportu ba populasaun Venilale. Sira-nia partisipasaun iha desportu maka’as maibé la tuir menus iha preparasaun espirituál. No iha kalan 31 nian iha atividade kalan kulturál ka konvíviu ho aprezentasaun dansa, múzika, knananuk nst, partisipa husi foin-sa’e sira husi Venilale, ne’ebé nia responsavel mak Pe.Avelino Guterres.
