Dili – “Agradese ba domin fraternidade mak dalan ba santidade”, ida ne’e mak ami nia tema ba festa agradesimentu komunidade B. Eusebia Palomino Comoro. Festa ne’e selebra iha dia 27- julho-2019, iha ne’ebé hahu ho atividade oioin atu bele hametin fraterniade liu liu hamutuk hasa’e hahi no agradese ba Maromak domin Nain ne’ebé bolu no halibur ami hamutuk iha tinan ida ne’e hodi fahe ksolok vokasaun no misaun nian. Moris hamutuk no fahe ksolok hamutuk tamba fiar.
Iha santa misa ne’ebé selebra husi Pe. Mario do Rosario SDB ami nia kapelano iha omilia halo ninia reflesaun kona ba tema “domin fraternu” katak, iha moris komunidade ita la buka malu atu moris hamutuk maibé tamba fiar no tamba obediensia, liga ho Maromak nia Lia Fuan liu liu pasajen Evanjellu kona ba leprozu nain 10 ne’ebé hetan isin diak, maibé ida deit mak fila atu agradese Na’i. Jestu simples husi leprozu ida ne’e mak gratidaun, sentimentu ne’ebé hatene rekoñese, ida ne’e mak 
presente ida ne’ebé hatene deskobre diak ne’ebé Maromak halo ba nia. Padre hatutan tan kona ba Amu-Papa Bento XVI nia omilia ruma kona ba esperiensia “don” ka presente mak esperiensia úniku, ne’ebé ita la merese maibé ita simu, ita la’os simu deit buat ne’ebé tenki simu maibé ita simu atu fo, tamba ita simu degrasa. Dala ruma ita fo ita la hetan premiu, maibé insulto. Ita oferece an ba Maromak atu oferese degrasa buat ne’ebé ita simu. Ida ne’e mak Saun Paulo dehan katak wainhira ita simu terus mak ita sai Kristu nian belun autentico liu tan.
Depois de Santa Misa ami fahe ksolok fraternidade nian ho han kalan no teatro sira nebe hametin tebes ami nia amizade no fraternidade. Hafoin madre Sebastiana taka ho buona noite kona ba ninia agradesimentu no apresiasaun ba valor pozitivu sira ne’ebé nia deskobre husi irman ida idak iha komunidade hodi fo korajen liu tan atu la’o hamutuk iha dalan ba santidade moris loron ba loron nian.
(Maria Sarmento G.)
